Read Gangte JOB 36 Bible Online

JOB 36 - Gangte bible

JOB 36

¹Elihu chun a gen zel a:

²Thip tadih inla, chawmkhat ei ngaitha nalai in, Pathien sik in gen ding neukhat ka nei nalai hi.

³Gamla taka pat in ka hetna hun lakhawm ing ka ting, Ei siempa chuh diktatna silh sak ing ka.

⁴Ka thugen chuh zuou ahi hiel puoh a, Hetna bukim nei chuh na kawmah a um ngâl a.

⁵Ngaitie, Pathien chuh a lopi a, Kuomah a musit kha puoh a; hetthiemna nasa tak a nei hi.

⁶Minunsiete chuh a hinghawih puoh a, himahleh, mi gimtheite chuh dik takin a ngaihtuoh sak sek hi.

⁷Mi diktatte apat chun a mit a heimang kha puoh a, Lalchutphah a lengte kawmah kumlekhuo’n a chut sak a, Limbawl in a um zaw sek ui.

⁸Kawlbut a hung hih u a, Sukgimtheihna khau a kân a hung hih u chun,

⁹Khutichun a thilhih uh leh a sukkhelhnau a sulang sek a, Ngawlhuoi takin a khawsa sek ui.

¹⁰Kihilhna lam achun a bil uh a dawh sak a, Manlohna lak apat vaikit dingin thu a pie a.

¹¹A ngaihthak u a, a na a sep u chun, A niteu chuh lamzang takin mang zo untin, A damsung niteu chuh kipahna’n mang zo in au.

¹²Himahleh, a khawksak loh u le chuh chemzâm in mangthai untin, Hetna nei lo in thi’n au.

¹³Lunggil a Pathien zahlo mite chun lungnatna a khawlkhawm u a, Amau chuh kantawm a hih sau inle panpihna ngênin a kiko puou hi.

¹⁴A vanglai tak un a thiu a, A hinnau chuh zahchâkna’n a tâwp a.

¹⁵Amah chun gimtheihna thuokpa chuh, A gimtheih thuokna apat chun a ladawk a, Sukgimtheihna mang in a bil uh a hihvak sak ta a.

¹⁶Ahi, lungkhamna apat chun mun lien tak, A neuhna lai um lohna achun hun umsak intin, Na ankuongte chuh sathau in hung dim ta’n a.

¹⁷Himahlele, nang chuh minunsiete vaihawmna na suguitung a, Vaihawmna leh dikna chun a hun mat na hi tai.

¹⁸Lungnatna a um ziekin kivengpha’n, khutilochun, a thâng in hun lamang kha’n tin, zie tieng chuleh kitatna nasa tak inle hun tandawk thei puo’n a.

¹⁹Amah chun na hauhsakna chuh a ngaisang dem? Ngaisang puo’n a, sana le, hatna leh thilbawl theihna chengcheng le ngaisang lo ding ahi.

²⁰Zan chuh ngaklah ki’n, Mite a mun u apat a a manthaina diu hun ahi ngâl a.

²¹Chingthei inla, gitlohna lam nga hiel ki’n, Ziehi gimtheihna thuok sanga na tel ahi ngâl a.

²²Ngaitie, Pathien chuh A thilhih theihna chun sang takin a chawisâng a, amah tawbang sinsakpa kuo a um le?

²³Kuo a a hih dân ding guot sak le? “Na hih dik puoi,” kuo a ti thei?

²⁴A nasepna limbawl ding chuh hezing un, zie chuh mihing te’n la a a pahchak sek u chuh!

²⁵Mi chengcheng in zie tak achun a en u a, Mite’n gamla tak apat in a thîl u a.

²⁶Ngaitie, Pathien chuh a lopi a, Amah chuh I na he puou a; A kum tam dân chuh suihdawk sen ding guol ahi puoi.

²⁷Tui mal kie haw chuh chung lam ah a la to a, Tuihu hih thieng in guoh a hung suok zel a.

²⁸Tichun, vante chun a hun sungbuou a, Mihingte chungah kiningting takin a hung zu sek hi.

²⁹Ahi, mihiemte’n mei kitawl dante hi a he thei um? Ahih loh leh a puon-In a van gi dul dulte kuo a hethiem thei ding?

³⁰Ngaitie, a kimvel ah kawlphe a thehzak a, himahleh, tuipi lituong chuh a khuh ta a.

³¹Ziehaw chuh mite mang in a vaihawm sak a, Amah chun nek ding kiting takin a pie a.

³²Meipite chun van chuh a khuh a, chun, a kâl a mei hung um te chuh tawi lo dingin thu a pie a.

³³Vanpi gi chun a chungchâng a phuong a, chun, gan guol te’n le thil hungtung ding chuh a heu hi.