Read Gangte JOB 37 Bible Online

JOB 37 - Gangte bible

JOB 37

¹Zie ahin ka lunggil a kilîng a, A mun apat in a kichawm a puo.

²Lunglut takin a van gi aw te ngaithau inla, a aw te leh, A kama hung pawt gite chuh.

³Vankhupsin nuoi ah a sawldawk a, A kawlphe chuh kâwlmawng tawp tiengin.

⁴Zie nung chun a aw chuh a hung gi a, A lopina aw chuh a sugi dul dul a; A aw a zak sau inle, a vak chuh a haih sak diek puoi.

⁵Pathien chun mak takin A aw a sugi dul dul a, Thilmak tak, I het phâk loh u chuh a hih seka.

⁶Vuk kawm achun, “Lei chungah kieh,” a ti a, Khutibang mah chun guohmal a châk saka, guohpi nasa tak le a zuk saka.

⁷Mitin cheng khut chuh a tiemteh a, tichun, A mi siem cheng chengte chun a hettheih na dingun.

⁸Tichun, gamsate chun kisêlna mun a zuon u a, A bu zawl u ah a um zing tau hi.

⁹Simlam apat in huihsie a hung nung a, Mâllam apat in huih vawt te,

¹⁰Pathien hatna hu ziekin vuk te chuh a khal zo a, Tui lien tak nasan le a khal zo tai.

¹¹Ahi, mei sah takte chuh a sunawm a, Mei lak achun kawlphete a thehzak a.

¹²Khawvel chuh amah thupiek dungzui in a kihei viel a, A thupiek cheng a hih bukim theihna dingun.

¹³Hilhgaihna ding ahim, a gam ziekin ahim, A hihloh leh lungsietna ziek ahim in a hun um sak ahi.

¹⁴Job, zie hi ngaitha tie, khawngai inla, Pathien thilmak hihte hi ngaihtuoh tie.

¹⁵Pathien in, meipi apat a vak zawt zawt a, kâwl a phe dinga a thupiek dante hi na hethei a ahim?

¹⁶Meipite kibûktuok tak a kilap theih dante, Hetna bukim neipa thilmak hihte hi na he thei em?

¹⁷Sim huih nun loh zieka leichung a hung thip dil del a, Na silhlechente a hung lum hethut dante hi na hethei hi?

¹⁸Amah guolin nangin lim-et banga khauh van chuh na zak palh thei em?

¹⁹A kawma I gen ding u chuh ei sinsak tiem u le, Thimna ziekin ka gen ding u le ka hedawk thei puou hi.

²⁰Ka gen ding chuh amah hilh masak ding ahi die? Ei leh ei kisukmang chuh mi a nuom ding um?

²¹Khutichun, van a thien tieng, mite’n mei lak a nisa vak chuh a en ngam puou a, huih anung a amau haw a mût thieng ahi.

²²Mâllam apat in êng lopi tak a hung pawt a, lopina nasa takin Pathien chuh a ûmkimvel a.

²³Bangakai hihtheipa chuh I mudawk thei puou a, Amah chuh thilhih theihna leh thudik a dim, Diktatna a buting ahi a khuttha puo’n a.

²⁴Zieziekchun mite chun amah a kihchau a, kuo hileh amau ngaih a ching kisate chule a zah chuom puoi.