Read Gangte JOB 38 Bible Online

JOB 38 - Gangte bible

JOB 38

¹Chun, LALPA chun chinpei apat in Job chuh a dâwng a:

²Hetna tello a thuhilhna bangmah lo guola gen beipa chuh kuo ahi?

³Pasal takin na puon chêng det inla, Thu hun dawng ing ka, ei hilh in.

⁴Leisiet kingakna ka vuih lai khan khawitak ah na um hi? Na heta ahih chun ei hilh ah.

⁵A let dante kuo a teh thei, na he himhim em, A hihloh leh a chung cham tehna kuo zam ahi?

⁶A kingakna chuh khawitaka kiphut ahi? A ning a suong vui chuh kuo ahi?

⁷Zingsawl aksite’n la a sakkhawm u a, van a thilhing chengcheng kipâk taka lasak sak kha kuo ahi?

⁸Ahih loh leh, lei gilsung apat a tuipi a hung kikhawh dawk lai khan, tuipite kawtkhak khum kha kuo ahi?

⁹Meipite chuh a silhlechen dinga ka siem lai leh, Thim sah tak chuh a puon phah dinga ka siem lai khan?

¹⁰A gamgi ding tieng uh ka siem a, A dalna leh a kawt dingte tawh.

¹¹“Zie tieng hin hung inla, zie khel hi hung kih, Zie tak ahin na chapona tuifawn kinawk hai hen,” ka tih ahi.

¹²Na pienni kipat khan zingkal hi thu na pie’n, Phalvak chun a hun leh a mun kihet ding in na hilh kha?

¹³Leisiet khuhna chuh hâwkdawk ahih a, A sunga minunsiete chuh a thinthak theihna dingin?

¹⁴Leisiet hi thil namna a tung nam bangin a su zatchuom a, Puon zie nuh bangin a langta a.

¹⁵Vak chuh minunsie te apat lâkdawk ahi a, A khut dawpsân u chule sukbawt in a um ta a.

¹⁶Tuipi nâk haw achun na chieh lut kha ta’m? A hih loh leh a thuk dante chuh na tawh viel kha?

¹⁷Thihna kawtkhakte chuh na kawma suklat ahi ta’m? Ahihloh leh thihna dailîm kawtkhak chuh na mu kha ta’m?

¹⁸Lei hi bang tienga lien ahih na hedawk thei hi? Ziehaw hi na hetsuok a ahih chun gen tie.

¹⁹Vak umna mun lampi chuh khawitak a? chuleh, thim hi khawitak muna um ahi?

²⁰Zie gamsung a chuh na chieh theih na dingin, A In zawtna lampi chin chuh na he thei hi?

²¹Na pien man tâk ziekin he tei inla, Na nite le a tam ta a puo!

²²Vuk kawihkhawmna mun ah na lut kha ta? Ahihloh leh, giel kawihkhawmna mun a le na lut kha ta?

²³Zie chuh buoina hun a ding leh, Kido leh gâlpi huna dinga ka kawih khawl ahi.

²⁴Vak kikhen zak na hi bang lampi ahi? Ahihloh leh, leichung ahin suohlam huih chuh khawitak a kihawm zak ahi?

²⁵Guohpi zukna ding lampi leh, Kêk lampi ding hi kuo siem ahi?

²⁶Kuomah umlohna leh mihing chên lohna, Gamthip mun awnga guohzuk sak ding,

²⁷Gamgaw leh mi chên lohna gam hihnawm ding a, Thaichi kungte dâwn dawk sak ding in?

²⁸Guoh in pa a nei a ahim? Daitui hung vatha sek hi kuo hin ahi?

²⁹Vuk hi kuo sûl akipat a hung pawt ahi? Chun, van a kipata vuk kie sek hi kuo hin ahi?

³⁰Tuite chuh suong bang mai in a tâk a, Tui thuk chungte chuh a khal a,

³¹Bawmbiel kihiptuohna khu na kânkhawm thei in, Sihzucho tien khu na phel zak thei hi?

³²Mazzaroth chuh a hunbi zel ah na puidawk thei em? Zamkhawlei leh a chate na puihuoi thei dem?

³³Van thu guotte chuh na he’n, Leia hin thu na neihsak thei dem?

³⁴Nang hun khuh dingin meipi apat, Guohpi tamtak na sam tha thei hi?

³⁵Kawlphete chuh na kawma hung dingin na sam in, “Zie hin ka um ui,” ti ding in na sawldawk thei die?

³⁶Kuo a sunggil lam haw a chitna kawih a, ahihloh leh, lungthim a hetthiemna pie sek?

³⁷Kuo a meipi sim thei hiela chitna nei a, A hih loh leh kuo a van tui-ûm sungbuo thei ding?

³⁸Leivuite a hung kisawmkhawm u a, Leitangte a hung kichâl khawm u a,

³⁹Sakeibaknei nek ding na hawl sak thei in, Sakeibaknei lun lai gilkiel na sulungawi thei hi?

⁴⁰A kul sungteu a a bawh lai u leh, A kuo sung teu a a um lai u chun?

⁴¹Va-âkte nek ding hi kuo piek ahi? A note nek ding tasam a, Pathien kawma a hâm lai u leh, nek ding hawla a vakvaih lai un kuo ahim nek ding pie?