Read Gangte JOB 39 Bible Online

JOB 39 - Gangte bible

JOB 39

¹Kawlsie laka sakel no neih phat na he? A hihloh leh sazuk no neih phat na tiemteh thei em?

²Tha bang zah sung a vawp uh na hethei hi? Chun, bangtik leh a no suok sek ahim tih na he thei em?

³Bang tika no nei dinga bawka, a no suok sek ahiu em?

⁴A noteu chuh a hung hât u a, Mun awngte achun a khanglien u a, A pawtdawk u a, a piteu kawmah a hungkit ta puou hi.

⁵Kuo a gam sabiltung zalen dinga sawldawk? Ahih loh leh sabiltung chan-gang takte chuh kuo a thahdawk sek?

⁶A In dingun gamthip ka guot sak a, A chênna dingun chi-gam ka guot sak ahi.

⁷Khawpi thawmgite chuh bangma’n a ngai puou a, Thil tawlte kiko thawm chule a ngaihsak diek puoi.

⁸Tangpi dungte chuh a tatna ahi a, Thilhing taphawtte chuh nek dingin a hawldawk sek hi.

⁹Zangsiel chun na ahun sep sak nuom dem? A hihloh leh na an piekna kawm achun a zan giek nuom dem?

¹⁰Lei kaihna ah khauhuol na bah sak thei dem? A hihloh leh na nung ah phaicham chuh a hun kaih chuop sak dem?

¹¹A hât bêk ziekin amah ah na kinga thei dem? A hihloh leh nasep ding amah khut ah na kawihtha mai dem?

¹²Na buhte chuh phuol a hun kawihkhâwm dingin, Na muong mai thei dem?

¹³Vahuong tha hawih tak haw khuh nang piek ahim? ahih loh leh ostrich thate leh mul haw khu nang piek ahim?

¹⁴Amah chun a tûi chuh tuol ah a nusieh a, Leivui in a tûi chuh a sulum sek hi.

¹⁵Mi’n a tawh kêk thei un, Gamsate’n le a chilgawp thei ui tih helo in.

¹⁶Amah no hilo guol hielin a note chungah a nunsie a, A nasep gimna chuh bangmahlo suok ding hilele khawk a sa puoi.

¹⁷A ziek chuh Pathien in chitna a hetngilh sak ziek leh, Hetthiemna le a piek loh ziekin ahi.

¹⁸Taimang dinga a kisak vanglak tieng leh chuh, Sakawl leh a chunga chuh mite le a musit sek a.

¹⁹Sakawl chuh hatna na piek ahim? A ngâwng le samul nem a na tuom sak ahim?

²⁰Khaupepi banga na kichawp sak ahim? A nakkhawn hâm dul dul hi a lauh-um na mai zên e!

²¹Nasa takin a kêng a tat a, a kingaisang mah mah a, gâlvan a kivante do dingin a pawtdawk a.

²²Lauhna himhim a he puoh a, a lungdawng puoh a, Chemzâm apat in le a taisie kha puoi.

²³A thal bawm haw chuh a gi lak lak a, Tiengcha leh thalpi val lek lek chu tawh.

²⁴Lauh-um tak leh lungna takin leitang a valh a, Pêngkun gi a zak chun a um hiet hiet thei puoi.

²⁵Pêngkun a git phawt leh, “Heih,” a ti a, Gamla taka pat in kido thawm te, sepaih lawiupate kiko git leh kido thawm chuh a hethei hi.

²⁶Mu chuh na chitna zieka kilap sanga, Simlam zuona a tha a zak ahim?

²⁷Muvanlai chunglama sang taka lengto leh, Sang taka bu a siet hi nang thupiek ahim?

²⁸Kawlkho haw ah a chêng a, suongpi kêk kal achun a giek sek hi.

²⁹Zie a pat chun nek ding a en thim a, A mit chun gamla tak a mu sek hi.

³⁰A note’n le thisan a châwp u a, chuleh, saluong umna tâk achun a um zel sek ui.