Read Gangte JOB 4 Bible Online

JOB 4 - Gangte bible

JOB 4

¹Tichun Eliphaz, Teman mi chun a dawng a, hiti hin a ti a:

²Na kawmah thu kamkhat gen leng na lung-awilo dem? A ziek chuh kuo a pau lo a kitim zing thei ding?

³Ngaitie, mi tamtak na na sinsak ta a, Khut hatlote na hih hât ta a.

⁴Na thu chun pukthate chuh na tung ding a, Khupzawite chuh na hih hât a.

⁵Himahleh, tuhin buoina chuh na chungah a hungtung ta a, Nang a hun sukha a, hihbuoi in na um ta a.

⁶Na Pathien kihchak hi na ginna kingak na pên leh, Na lampi zan na pên hi a na kineppih lawh hilo ahim?

⁷Vak ngaihtuoh veng veng tie, sukkhelh neilo kuo a mangthai sek? Ahihloh leh, khawi ah ahim mi kitûp hihmangthai a a um khâk uh?

⁸Kei muh dân chun manlohna lo kai a, Buoina tuh chun zie mah chuh a ât kit sek ui.

⁹Amau chuh a nak-hawma hu pawt in Pathien in a sumangthai sek hi.

¹⁰Sakeibaknei kitum git haw, sakeibaknei hâng aw haw, Sakeibaknei vanglai ha haw chuh a bal a.

¹¹Sakeibaknei têk chuh nek ding tasam in a mangthai a, Sakeibaknei nokaite chuh a kithehdalh u a.

¹²Khatvei hi a gukcha’n ka kawmah thu a hung tung a, Ka bil hin zie a hogukna chuh a za a.

¹³Mi ihmutthip kal taka, Zan a kilâkna chuh ka ngaihtuoh lai in,

¹⁴Lauhna ka chungah a hung tung a, kilinna tawh, Ka guh chengcheng a hihling a.

¹⁵Tichun ka maikawk ah thagau a chieh a, Ka timul a tho sulsul a.

¹⁶A ding zinga, mahleh a mel umdan chuh ka he thei puoh a; Zie lim chuh ka mittha ahin a châm zing a; A thip kêi a, chun, aw ka za a.

¹⁷Pathien masang ah mihing thithei te hi a diktat theia ahim? A siempa masangah mihing hi a thiengtho theia ahim?

¹⁸Ngaitie, a suokte le a gingcha zo puoh a, A vânsâwlchâkte nasan le ngawl a sa a.

¹⁹Khutichu ahih leh bellei In a chêngte chuh a gingcha mawh zawsem na ding e, A kingakna chuh leivui ahi a, Mitthak nasan inle a sukgawp theih chuh ahi.

²⁰Zingkal leh nitâk kikal in a mangthai sek u a, Hetdawk kitna himhim um lo in a mangthai sek ui.

²¹A sung u a puon-In henna khau suktan in a um a, Pilna tasam zing kawmin a thi sek ui.