Read Gangte JOB 41 Bible Online

JOB 41 - Gangte bible

JOB 41

¹Ngakuoi in Leviathan na khaidawk thei dinga ahim? A hihloh leh khauhuol in a lei na khitdên thei dem?

²A nâk ah khau na vawh thei in, Ngakuoi in a khaguh ah na kuoi let thei dem?

³Na kawmah ngetna tamtak a siem dem? Na kawmah Aw nem takin thu a gen dem?

⁴Kumlekhuo a suok a na mat theihna dingin, Na kawmah thugawlh a siem dem?

⁵Vacha tawbang phetin na kicheppih thei dem? A hihloh leh na suoknu dingin na hên thei dem?

⁶Ngaman te’n amah mang in ankuong a siem ding um? A hihloh leh sumkawlveite chuh asa a kihawm thei ding um?

⁷A vun dim chun thikling leh, A luchang ah ngatieng te na phut dim thei dem?

⁸A chungah na khut vak tha’n la, Na kinak dân dingu chuh vak ngaihtuoh in, Hih zawm kit hiel puo’n la.

⁹Kuole a mat guo taphawt chuh lungkieu in tin, A va mu maimai te le lungdawng lo ding ahiu em?

¹⁰Amah chawktho ding khawp in kuomah mi hangsan a um puou hi, kuo ahi a masanga ding thei ding?

¹¹Ka ditkit dinga kuo ahi thil ei pie masa? Vannuoi a thil chengcheng hi keia ahi?

¹²A khutlekengte chung thu achun thip mai thei puo’ng ka, A hatna ziekte leh a duong hawih ziekin le thip diek puo’ng ka.

¹³Kuo a a silhlechen chungnung hâwk sak thei ding? A thik-awmphaw thuohnih sung achun kuo a lut thei ding?

¹⁴A maichang kawtkhak chuh kuo a hawng thei ding? A ha kimvel chuh lauh-um tak ahi ngâl a.

¹⁵A nungzang vun chuh gâlvan a tien a kisiem ahi, Dettak a kichâl khum ahi.

¹⁶A kikal chuh a kichih bêk ziekin, A kal achun huih nasan a lut thei puoi.

¹⁷A kizawm tuoh chiet u a, a kichâlmat u a, Sukkhen theih ahi puoi.

¹⁸A hu a hung thah dawk chuh a vak seng sung a, A mit haw chuh phalvak tûng chah a bang hi.

¹⁹A kam a kipatin meikuong a pawt a, Meisite a pak lak lak a.

²⁰A nak hawm apat in meikhu a hung pawt a, Bela tuiso leh hâltuina mei a kipata meikhu pawt tawbang in.

²¹A hu chun suongmeihawlte a mûtkuong a, a kam apat chun meikuong a pawt a.

²²A ngâwng ah a tha hatna a um a, A masanga lauhnate chuh a kipahna a hung hi tai.

²³A taksa thaguite chuh a kizawm khawm a, dettak in a kiphan chak a, suktawih zawh ahi puoi.

²⁴A lungchang chuh suong banga tâk ahi a, Ahi, buh gawihgawpna suong nuoi do bang hiela tâk ahi.

²⁵Amah a hung thawhdawk hiel chun chuh, Pasalphate le a lau u a, Lauh takluot ziekin amau leh amau a kihengilh hiel sek ui.

²⁶Chemzâm in sun mahleu, khawk a sa puoh a, Tiengcha ahim, thalpi ahim, mawlhzum ahim inle.

²⁷Thik chuh buhpawl bang phetin a ngai a, Sumeng chule thing muot tawbang phetin.

²⁸Thalpi’n a sulau zo puoh a, Amah ding chun vaisuongsehte chuh buhpawl bang phet ahi.

²⁹Thalchang chule buhpawl banga ngaih ahiu a, Tiengcha a mi’n a khawh chuh amah chun a nuihsan mai hi.

³⁰A nuoi lam phulipte chuh belhal hiem tak tawbang ahi a, Dâwp laka chun buhphuol bang mai in a kiphah hi.

³¹Tui thuk tak chuh bel so bang mai in a hih so a, Tuipi chuh thau bel bang mai in a siem a.

³²A chiehna nung chuh tui a phuon buoh buoh a, Mi’n tuipi chuh vam bieh buoh in a mu sek ui.

³³Leichung a hin amah tawbang himhim a um puou a, thilsiem lauhna neilo hiel chuh ahi.

³⁴Thil lopi leh mak taphawt chuh a khuolchil a, amah chuh mi chapote lak achun leng ahi.