Read Gangte JOB 42 Bible Online

JOB 42 - Gangte bible

JOB 42

¹Ziephet chun, Job chun LALPA chuh a dâwng a:

²“Thil chengcheng na hih thei hi tih ka hêi, Na thiltup te le dal ding guol ahi puoi.

³‘Na thuhilhte ngawlhuoi taka ana ngaihsak lo pa hi na dawng kha a, zie chuh kei ka hi, ka hetphakloh, keia dinga mak taluote haw chuh ka na gena.’

⁴A na ngaitha tie leh, hun gen ing ka; Thu hun dawng ing ka ting, nangin ei hilh in.

⁵Bil a zakna mai in ka na za a, himahleh, tuhin ka mit ngeia ka hung muh tâk ziekin,

⁶Zieziek tak chun kei leh kei ka kikihdak a, Vut leh leivui laka chun ka kisik hi,” ti’n.

⁷Chun, LALPA’n zie thute hi Job kawma a gen zawh chun LALPA mah chun Teman mi Eliphaz kawm achun, “Nang chung leh na guolte nih chunga khan ka lungnatna a kuong dawka; ka suok Job guolin ka chungchâng thu dik takin na gen puoh ngâl u a.

⁸Khutichun, tuhin bâwngchal sagih leh belamchal sagih keng in ka suok Job kawm achun chieh unla, nang u a dingin hâlmang kithawihna va siem unla. Khutichun ka suok Job chun hun paucham sak intin, zie chuh a na pawm ing ka ting, na ngawl dân tak u chun hun thuk puo’ng ka. Ka suok Job guolin ka chungchâng thu dik takin na gen puoh ngâl u a,” a ti a.

⁹Khutichun, Teman mi Eliphaz leh Shuhi mi Bildad leh Naamath mi Zophar te chun a hih u a, LALPA’n thu a piek bang tak chun a hih u a; tichun LALPA’n Job ngetna chuh a na pawm sak ta a.

¹⁰Khuti a Job a guolte thuma dinga a paucham lai chun, LALPA’n Job chuh a vangsak kit ta a, LALPA chun Job chuh a maa a neih lehnih a pie kit ta a.

¹¹Tichun, a suohpih numei leh pasal chengcheng leh tuma a a melhette chengcheng chuh a kawmah a hung u a, a In achun an a neu a. LALPA’n a chunga thil phalo a tun sak chengcheng thu a chun a thuokpih u a, a lungmuon u a. Mi chengin a kawm achun dangka leh sana zungbuhte a pie chiet u a.

¹²Khutichun, LALPA chun Job hun nunung lam chuh a masa lam sanga nasa takin a vangsak a; belam singkhat leh sangli, sangawngsau sanggup, bâwngchal tuok sangkhat leh sabiltungpi sangkhat a nei a.

¹³Chun, chapa sagih leh chanu thum le a nei a.

¹⁴A upapen min chuh Jemima a sa a, a nihna chuh Kezia a sa a; thumna chuh Keren-happuk a sa a.

¹⁵Gamsung chengcheng achun Job chanute guola melhawih a um puou a. A pau chun amau haw chuh a suohpih pasalte laka go chan ding le a pie chiet a.

¹⁶Zie nung hin Job chuh kum za leh kum sawmli a dam a, a chapate, a chapa chapate, suon li tiengin a mûi.

¹⁷Khutichun, Job chuh têk tak leh kum ting takin a thi tai.