Read Gangte JOB 7 Bible Online

JOB 7 - Gangte bible

JOB 7

¹Leichung ahin mihing in na haksa sep ding a nei zing hilo ahim? A nite chuh kithalak a nasemte ni tawbang hilo ahim?

²Suok, ni lîm utcha mah mah tawbang in leh, Kithalawh mi, a lawh mai ngaka um tawbang ahi.

³Bangmah lo mai in tha tamtak ka na mang zo a, Zan chim um takte kei dingin guot ahi a.

⁴Ka kuol leh, “Bangtik leh ka tho in zan hi a bei die aw,” ka ti seka; Mahleh zan a sawt mah mah a; Thingzangvak tiengin ka kilek ka kilek a.

⁵Ka taksa chuh lung leh buon in a dim a, Meima khik in a tuom a, a nai in a luong dawk hiel ta a.

⁶Ka nite hi puon-gânte khawhthei sangin a chan-gang a, Kinepna beiin a tawpna atung a.

⁷Ka hinna hi aw Pathien, hatkhat bang mai ahi tih hezing inla, Ka mit in thilpha mu ta lo ding ahi hi.

⁸Tu’n na mit un nei muu a, mahleh ei mu kit ta puo’n la, Ei hawl in na tin, mahleh na mit u a nei et zing lai un chieh mang ding ka hi.

⁹Meipi a kithiel a, a manthai bang phet hin, Sheol-a chieh suk taphawt chuh a hung pawt kit kha puou hi.

¹⁰A In achun vaikit kha ta puo’n tin, A mun in amah he kit diek ta puo’n a.

¹¹Zieziekchun thugen kisûm ta puo’ng ka ting, Lungthim gimthei tawpkhawk in thu gen ing ka ting; Lunggil na tun tun in phunchiek ding ka hi.

¹²Tuipi ka hi a ahim, tuipi ngapi ka hi a ahim? Kei ei entha ding na kawih?

¹³Ka zalkhun in ei thamuon intin, Ka phunchiekna hi ka kuolna mun hin ei hihnêp sak ina, ka ti a;

¹⁴Nang chun la mang lam in nei sulau a, Kilâknate mang in nei lauhsak a,

¹⁵Ka lungthim chun awklup a tel zaw hiel ta a, Hin sangin thih a tel zaw hiel hi.

¹⁶Ka chim tuntun a, hin ka khawp tai; Kei ngawnin ei um sak mai in, ka hinna hi hatkhat chauh ahi ngâl a.

¹⁷Mihing hi bang ahi a, na ngaihsan a? A chungu a na lunggil na khuti ngak ahim?

¹⁸Zing chengin amah na veh sek a, Bangtik laia le na patep sek ahim?

¹⁹Bang chan ahim gamdang ei ngat san lo a na um a, Ka chil ka valh sunghaw ale ei thahtham lo a na um ding?

²⁰Ka gitlohna’n a hun suna a ahim, Aw, mihingte vengpa, Bangati a nei tup mawng mawng ahim? Bang zieka nanga dinga puokgik hiding ka him?

²¹Bangati a ka sukkhelhna leh ka gitlohna na ngaihdam loh a? Tuhin ka thâna kuol pai ding ka hi ta ngâl a, ei hawl in na tin, mahleh um ta puo’ng ka.