Read Gangte SAM 102 Bible Online

SAM 102 - Gangte bible

SAM 102

¹Aw LALPA, ka pauchamna hi ngaitha’n la, Ka kiko husa hi na kawm tung hen.

²Ka lungkham ni’n keimah ahin na mai sel ki’n la: Ka lama hin na nakhang hun dawh inla; Ka hun sap tak leh kin takin ei dâwng in.

³Ka damsung ni haw hi meikhu guol in a zam mang a, Ka guh haw hi thukkhuk bang in a sa a.

⁴Ka lunggil hi hampa bang in haihlup in a um a, a vuoi zo tai; Ka an nêk ding le ka hengilh hiel hi.

⁵Ka tau husa ziekin; Ka guhhaw hi ka sa ah a bek chak kêi a.

⁶Gamgaw a tuivapi bang ka hi a; khuo hawm nung simbu bang phet ka hi tai.

⁷Ka hak zing a, Vasie amah maia In chunga um tawbang phet ka na hi tai.

⁸Ka melmate chun ni changtum in ei gensie sek u a; Ka chunga hangsante chun kei tawbanga um dingin hansie a buok khum sek ui.

⁹Vut hi an guol in ka ne a, Ka dâwn ding chuh mittui tawh kihel ahi a.

¹⁰Na lungkim loh mah mah leh na lungnat ziek in: Nang nei dawm kâng a nei paihmang ta ngâl a.

¹¹Ka damsung nite chuh nitâk lîm kiem lam bang ahi a; Hampa bangin ka vuoi ta a.

¹²Aw LALPA, nang vang chuh kumlekhuo’n Lalchutphah ah chu’n na tin; Na min chuh a khang akhang in hetzing in um in a.

¹³Tho in na tin, Zion tâng chuh lungsiet inla: Amah chuh lungsiet ahun ta ngâl a, a hunbi chu a tung tai.

¹⁴Na suokte’n a suongte chu a ngainau in, A leivui le a lungsiet u a.

¹⁵Khutichun namte chun LALPA min chuh lau un tin, Lei a lal chengcheng chun na lopina chuh lau un au.

¹⁶LALPA chun Zion chuh a tungdawk kit ding ahi ngâl a, A lopina a kivan in ahung kilang tai.

¹⁷Chagahte ngetna chuh a limsak a, A pauchamnau chuh a musit puoi.

¹⁸Zie thu chuh khangthak hung um zelte ding chun zik hi’n tin: Ahung pieng zel ding te chun LALPA chuh pakcha’n au.

¹⁹Amah chun a mun thiengtho sang tak apan chun a zuk en suk ta a; LALPA chun van apat khun lei hi a en a;

²⁰Suongkul tâng haw tau git ngaitha ding leh, Thi dinga seh te chu zalen sak ding in;

²¹Mite chun LALPA min chuh Zion a a phuonzak u a, Jerusalem a a pahchak theihna ding un.

²²Mitinte chuh a hungkhawm u a, lalgamte chu LALPA ho dinga a hung khawm tieng u leh.

²³Amân lamkal lak ah ka tha a chauh sak a; Ka damsung hi a hih chawma.

²⁴Aw ka Pathien, ka vanglai ni haw ahin ei lamang ki’n la, ka ti a: Nang kum haw chun khang um sung cheng a daih hi.

²⁵Lei kingakna chu malai pek a na vuih ahi ta a, Van haw khule na khutsuok ahi a.

²⁶Ziehaw chuh hung beimang intin, nang vang chuh um zing inla: Ahi, ziehaw chengcheng chuh silhlechen bangin hung chul untin; Silhlechen bang in theng in na tin, hung zatchuom tan au.

²⁷Nang vang chuh na ngêi ngêi na hi a, Na kumte chun beih ni himhim nei puo’n au.

²⁸Na suokte chate chuh bit takin um zing untin uh, A suonteu chuh na masang ah hihdet in um un au.