Read Gangte SAM 103 Bible Online

SAM 103 - Gangte bible

SAM 103

¹Aw ka hinna, LALPA chuh pakcha’n la; Ka sunga um cheng chengte haw, a min thiengtho chuh pakchau in.

²Aw ka hinna, LALPA chuh pakcha’n la, A thil hihphat cheng chengte chu hengilh ki’n.

³Amah chun na thulimlohna chengcheng a ngaidam sek a: Na natna chengcheng a hih dam sek hi;

⁴Manthaina apat in na hinna a tan sek a; Zahngaihna leh zaidawhna te chun a hun khuhsak sek hi:

⁵Na damsung chengin na kam chu thilpha’n a hih tai sek a; Khutichun na tanglakna chuh mupi banga siemphat in a um kit sek.

⁶LALPA chun nuoisiehna thuok chengcheng a ding in, Thil dikte hih in a vaihawm sak sek hi.

⁷A lampite chuh Mosi a hetsak a, A thil hihte Israel suonte le a hetsak a

⁸LALPA chuh lainatna a dim, mi lungsiet thei tak, Lungnieng tak, zahngaihna hau tak ahi.

⁹Amah chun gai zing puo’n tin; A lungnatna le kumlekhuo’n vawp zing puo’n a.

¹⁰I gitlohnau bang in I chung u ah a hih puoh a, I thulimlohnau bang inle ei thuk diek puoi.

¹¹Van khu lei chung sang taka a um mah bang in, Amah kihchate chungah a zahngaihna a lien mah mah hi.

¹²Sak le thang a kigamlat bang in, I sukkhelhna teu eimau apat in a kawihmang kêi tai.

¹³Pa’n a chate a lungsiet bang in, LALPA chun amah kihchate a lungsiet sek hi.

¹⁴I taksa kisiem dân uh a he a, Leivui mai I hiu hi tih a hetzing ziek in.

¹⁵Mihiem vang a damsung ni teu hampa bang ahi a; Gam pakcha bang in a paklun sek a.

¹⁶Huih in a mût a, a bei sek u a; tichun, A umnau chuh het kit ahi ta puoi.

¹⁷Himahleh, LALPA zahngaihna vang chuh amah kihchate chung achun kumsawt apat kumsawt tiengin um in a, A diktatna le a tusawn tiengin um in a.

¹⁸A thuthun zui ta pohte leh A thuhilhte mat guoa zui ta pohte chung achun.

¹⁹LALPA chun a lalchutphah chuh van a khun a kawih det a; A gam chun bang mah cheng chung ah vai a hawm a.

²⁰A vânsâwlchâkte haw, A thu ngaitha a, a thu zui sek, hatna a lopi te haw, LALPA chuh pakchau un.

²¹A sepaihte haw, a deihlam hih sek, a nasemte haw, LALPA chuh pakchau in.

²²A vaihawmna mun chengcheng leh a khutsuok cheng chengte haw, LALPA chuh pakchau in; Aw ka hinna, LALPA chuh pakcha’n.