Read Gangte SAM 104 Bible Online

SAM 104 - Gangte bible

SAM 104

¹Aw ka hinna, LALPA chuh pakcha’n. Aw LALPA ka Pathien, nang chuh na lopi mah mah a; Chawihânna leh lopina’n na kivan a.

²Nang chun vak khu puon bangin na silh a; Van haw khu puon-In bangin na luoimalh a:

³Amah chun a inkam chungnung kalkhang haw chu tui chung haw a khun a zam a; Meipi haw a kangtalai in na siem a; huih tha haw chung ah na vakviel a:

⁴Huih haw chuh sawlchak in na manga a; Na nasemhaw chuh meikuong dul dul na suok sak sek a:

⁵Lei chung kingakna haw chuh na phum a, Kumlekhuo a a kilin lohna ding in.

⁶Nang chun lei chung hi tui thuk tak in puon bangin na silh sak a; Tui haw chuh tâng chunga chun a um pheuphou a.

⁷Na hilhgaihna ziek chun a tai mang a; Na vangi husa ziek chun a leng mang pai zieng u a;

⁸Tang haw achun a kalto u a, guom haw achun a kum suk u a, Amau dinga mun na guot sakna lam achun.

⁹A chieh pai loh na dingin gamgi na khanga; Tia chuh lei a chupmang kit tak lohna ding in.

¹⁰Nang chun guom haw achun tuinakte na put saka; Tang kal haw a chun a luong u a:

¹¹Ziehaw chuh gamsa te kieng achun dâwn ding in a pie a; Gam sabiltung haw chun a dangchâk uh a hihhai sek ui.

¹²Lui pang haw achun chung leng vachate chun umna a nei sek u a, Thingbâk haw lak achun la a sa sek ui.

¹³Nang chun na indan chungnung a pan khun tâng haw khu tui in na vak sek a: Lei hi na khut nasep in a tai sek a.

¹⁴Hampa chu ganchate dingin na keh sak sek a, Thaichi chu mihiem mat dingin na keh sak sek a; Lei apat a nek ding a pawtdawk theihna dingin.

¹⁵Mihiem lunggil kipah sak na ding uain tawh, A mai hih hawih na ding sathau tawh, Mihiemte lunggil suhat ding chângthâk tawh.

¹⁶LALPA thing haw chuh kiting taka tui buok ahi a; Lebanon tânga sidar thing a phuh haw chuh!

¹⁷Zie tak a chun vachate’n bu a sieh sek u a: Vaiva haw a ding chun châk thing haw chuh a In uh ahi.

¹⁸Tang sang haw chuh sakel a ding ahi a; Suongpi haw chuh sazupi a dinga kihumbitna ahi.

¹⁹Tha chuh hunbi hetna dingin na guot a: Nisa khun a tum phat ding a he a.

²⁰Nang chun thim na siem a, zan a hung hi sek hi; Zie tieng chuleh gamnuoi a sa tin cheng chu a ta dawk sek ui.

²¹Sakeibaknei thahat lai haw chun a samat ding humham khum in, Pathien kienga kipat a nek dinguh a hawl sek ui.

²²Ni a suok tieng leh a chieh mang u a, A umnau kawlpûk chiet achun a kuol sek ui.

²³Mihiem chuh a nasep na ding zuon in a pawt a, Nitâk lam tiengin a sem sek hi.

²⁴Aw LALPA, na thilhih haw chuh a tam na mai zên e! Abawn un pilna a na siem chiet ahiu a: Lei chung hi na thilsiem a dim ahi.

²⁵Zie tak akhun tuisuohgiet a um a, lien tak leh nasatak mai chuh, Zie chun bawkvaka chieh simsenloh a um u a, Hinna nei gamsa neu leh a lien haw chuh.

²⁶Zie khun kuonglien haw a kitawl u a; Zie khun Leviathan a um, a sunga kichiem dinga na siem ngêi chuh.

²⁷Ziehaw chengcheng chun a hun ngak chiet u a, Ahun taka a an uh na piek chiet na dingin.

²⁸Amau haw na piek ta poh chu a luokkhawm sek u a; Na khut na zak tieng leh, amau chuh thilpha’n a dim sek ui.

²⁹Na mai na sel tieng leh a lungkham sek u a; A hat uh chuh na lâksak tieng leh a thi sek u a, leivui a chun a kileh kit sek ui.

³⁰Na thagau chuh na sawldawk a, siem in a um sek ui; Chun, lei chung hile na siemthak kit sek hi.

³¹LALPA lopina chuh kumlekhuo’n um hen la; LALPA chuh a thilhih haw a chun lawp hen.

³²Amah chun lei hi a en a, a kilîng sek; Tang haw chuh a khawih a, meikhu a pawt sek.

³³Ka damsung cheng in LALPA chawiân in la sa’ng ka ting: Ka hinlai chan in ka Pathien pakcha’n la sa’ng ka.

³⁴Ka ngaihtuohna hi amah dingin kipahna hi hen la: Kei chuh LALPA achun ka kipâk ngâla.

³⁵Migilo haw chuh lei apat in sukmang in um u hen la, Minunsiete chuh um ta kiu hen. Aw ka hinna, LALPA chuh pakcha’n. LALPA chuh pakchau un.