Read Gangte SAM 105 Bible Online

SAM 105 - Gangte bible

SAM 105

¹Aw LALPA kieng ah kipahthu gen unla, a min lo un; Mi cheng lak ah chun a thilhih haw chu hetsak un.

²Amah pakcha’n la sau unla, amah chawiân in la sau in; A thilmak hih cheng te chu gen viel un.

³A min thiengtho chuh suong un: LALPA hawlte lungthim chu lawp hen.

⁴LALPA leh a hatna chu hawl unla; A mel chuh hawl zing un.

⁵A thilmak hih haw leh a thilhih lamdang te leh, A kama vaihawmna chuh hezing un.

⁶Aw a suok Abraham suonte haw, A tel chuom Jakob suonte haw.

⁷Amah chuh LALPA I Pathien u chuh ahi: A vaihawmte chuh lei chung cheng ahin a um a.

⁸A thugawlh chuh kumlekhuo’n a hezing a, Khang sangkhat tienga a thu na piek chuh;

⁹Abraham kawma a thugawlh leh, Isak kawma a kihâksielna chuh.

¹⁰Zie mah chuh thuguot bangin Jakob kawmah a hihdet a, Israel kawmah kumlekhuo thugawlh ding in:

¹¹“Kanaan gam hi hun pie’ng ka, Na go luoh ding chuh,” ti’n.

¹²Mi tawmcha ahih lai u khan; Ahi, mi tawmcha cha, zie gam achun malzin ahi ngâl u a.

¹³Nam chuom chuom kawmah a chieh u a, Lal gam khata kipan in mi zatchuom chuom kawmah.

¹⁴Kuo mah nuoisieh a phal puoh a: Ahi amau haw ziekin lengte le a hilhgaih a;

¹⁵“Ka sathau nuhte chu sukha kiu inla, Ka thiemgaute chu suna kiu in,” ti’n.

¹⁶Zie gama chuh kie dingin kiel a sama; Nek ding mawng mawng a umsak ta puoh a,

¹⁷Amau ah mi a sawl a; Joseph chuh suok dinga khawt in a um a:

¹⁸A kengteu achun kawl buhsak in a um u a; A ngâwng u achun thik puonâk ngâwng a um a:

¹⁹A thugen a tun masang sieh chuh; LALPA thu’n amah chu a patep a.

²⁰Lalpen chun mi a sawl a, amah chu a thahdawk a; Mipite chunga vaihawmpa chun a thahdawk ta a,

²¹A inkawte chunga lawiupa ding leh, A thil neih chengcheng chunga vaihawm dingin a siem a:

²²A milien haw chuh a deih dân dana sinsak ding leh, A upa hawu hih ching ding in.

²³Tichun, Israel chule Aigupta gam ah a chieh a; Jakob chuh Ham gam achun malzin guolin a um a.

²⁴A mihaw chuh nasa takin a hih pung a, Amau haw dote sangin a hih hât zaw a.

²⁵A mite mudah dingin a lungthim uh a leh ngat sak a, A suokte chunga gukhah taka hih dingin.

²⁶A suok Mosi tawh a mi tel Aron chuh a sawl a.

²⁷Amah chun tiemtehna haw chu a hih u a, Ham gam achun thilmakte a etsak u a.

²⁸Amah chun thim a sawl a, gamsung chu a thim ta a; A thu chuh a nielkalh u a.

²⁹A tui hawu chuh thisan a suok sak a, A nga hawu chuh a thih zawh sak ta a.

³⁰A gam u chuh ukeng in a dim ta a, A lalteu insung nasan ah.

³¹Amah chun thu a gen a, tichun tho tampi a hung a, Hik le a gamsung u achun a hung dim ta a.

³²A kawm u ah guoh thasang in giel a pie a, A gamsung u ah chun kawlphe a vak zawt zawt a,

³³A grep gui hawu leh a theipi kung hawu a thih sak a; A gam u a thing haw chu a hih bawng a.

³⁴Amah chun thu a gen a, tichun khaupepi haw chu a hung u a, Chun, khaupe note chu simsenloh khawp in a tam u a.

³⁵Ziehaw chun a gam u a thaichi tin cheng chuh a ne zo u a, A lei gah hawu cheng le a ne zo vek u a.

³⁶A gamsung u a nautil chengcheng chu a that u a, A hâtnau gah masa haw cheng chuh.

³⁷Tichun Israel chuh dangka leh sana tawh a puidawk ta a: Amau haw nam lak achun mi hatlo khat chale a um puou.

³⁸A pawtdawk lai u chun Aigupta te chuh a kipâk u a: Amau haw tizatna a adim tâk ziekun.

³⁹Amah chun a lieh dingin meipi a zam sak a, Zan a amau haw salhvak dingin mei a pie a.

⁴⁰A ngên u a, tichun vamim a hun pie a, Van apat in kiting takin chângthâk a pie a.

⁴¹Amah chun suongpi chuh a hawng a, tichun tui a hung kichikdawk a, Gam gaw achun lui tawbang hiel in a luong ta a.

⁴²A thutiem thiengtho a suok Abraham tawh a thutiem thiengtho kha a hezing ngâl a,

⁴³Tichun a mite chuh kipâk takin, A mitelte chuh lasa kawmin a puidawk ta a.

⁴⁴Chun, gam haw chu namte kawm achun a pie a; Amau chun mite hauhsakna chu a luoh tau a.

⁴⁵A thuguot haw chuh a zawp theih u a, A dân haw chuh a vawp phat theihna ding un. LALPA chuh pakchau un!