Read Gangte SAM 106 Bible Online

SAM 106 - Gangte bible

SAM 106

¹LALPA chuh pakchau in. Aw LALPA kawmah kipah thu gen un; amah chuh a pha ngâl a: A zahngaihna chuh kumlekhuo a um ding ahi ngâl a.

²Kuo a LALPA thilhih lopi tak haw chuh gen thei a, A pahchakna chengcheng hetsak suok kêi thei ding?

³Thudik vawp pha haw chuh a hamphau hi, Bangtik a le diktat taka hihte tawh.

⁴Aw LALPA, na mite na deihchuomna’n nei hezing inla, Aw na hukdamna chun ei vehtha’n la:

⁵Na mitelte hamphatna ka muh theih a, Na namte kipahna a ka lawp theihna ding leh, Na go luoh haw ka kisuonpih theihna dingin.

⁶Kei u leh ei suonteu khan thil ka na hihkhiel u a, Thil gilo ka hih u a, nunsie takin ka na hih tau hi.

⁷Ei suonteu khan Aigupta gam ah na thilmak hih haw khah a ngaihtuoh puou a; Na zahngaihna nasa tak kha a hezing ta puou a; himahleh, Tuipi San ah khan Chungnung pên pa kalh in a hel zaw tau a, Tuipi San ngêi a khan.

⁸Khuti tieng chun le amin ziekin amau haw chuh a hukdam ta a, A thilhih theihna lopi tak chuh a hetsak theihna dingin.

⁹Tuipi San chuh a hilhgaih a, tichun a hung kang ta a: Khutichun amau haw chu thaleka a puih kaih tawbang in tui thuk tak a chun a puikai ta a.

¹⁰Amau haw mudahpa khuta pan chun a hukdam a, Melma khuta pan chun amau chuh a tan ta a.

¹¹Tui haw chun a melma teu chu a chup mang zo ta a, Khatchale dam in a suokcha puou hi.

¹²Zie lai chun a thu haw chu a taksang u a; A pahchakna la a sau a.

¹³Himahlele a thilhih haw chu a hengilh pai zieng u a; A lemguot chuh a ngak ngâp puou a:

¹⁴Himahleh, gamgaw a chun duhchak nei in a kithing u a, Gamgaw a chun Pathien a zedap zaw tau a.

¹⁵A thil nget u chu a pie a; Himahleh a lak u achun natna hi a lênsak ta a.

¹⁶A giehmun u a chun Mosi a mitthîp u a, chun, LALPA mithiengtho Aron chung a chun itthik na a nei u a.

¹⁷Lei chun a kam a ka a, Dathan chu a valh a, Abiram nungzuite chu a khuh zo ta a.

¹⁸Amau haw lak u a chun mei ahung kuong a; Meikuong chun minunsiete chu a katum ta a.

¹⁹Horeb tâng achun bâwngno lim a siem u a, A lim kisung chuh a ho tau a.

²⁰Khutibang chun Pathien lopinau chu bâwngchal hampa pet lim tawh a theng u a.

²¹Pathien a hukdampau chuh a hengilh tau a, Aigupta gama thil lopi tak tak hih pa chuh, A hukdampau Pathien chuh a hengilh tau a,

²²Ham gama thilmak a hih te, Tuipi San panga thil huoisie takte hihpa chuh.

²³Zieziekchun hun sumang khan a, ti a a lungnat na thêm lungdam dingin, A mi tel Mosi chuh a masang ah ding kivang henla hileh chuh, sukmangthai a guot ahi ta khah!

²⁴Ahi, gam nuom tak chuh a musit u a, A thutiem chuh a gingcha nuom puou a.

²⁵A puon-In hawu achun a phunchiek zaw tau a, LALPA aw chuh a ngaitha nuom puou a.

²⁶Zieziekchun khut zak in amau kawm achun thu a tiem a, Amau haw chuh gamthip a ahih pukna ding in.

²⁷A suonteu chuh namte laka thehzak ding leh, Gam haw a thehchekna ding in.

²⁸Tichun, Baal-peor lam achun a belh u a, Mithi kienga thilpiek haw chuh a neu a.

²⁹Khutichun a thilhih hawu in amah chuh a sulungnau a; Tichun hipi chu a chung u ah a hung leng ta a.

³⁰Zie lai chun Phinehas chu a dinga amau a dingin a ngetsak ta a: Khutichun hipi chuh a hung kithiel ta a.

³¹Zie chuh a khang a khang dingin amah diktatna a guot ahi tai,

³²Meribah tui a chun le a sulungnau a, Tichun amau haw ziekin Mosi chungah thil phalo a hung tung ta a:

³³A thagau a sunau a, A kam in thu phalo a gen lawh ta a,

³⁴LALPA’n a kawm u a thu a piek bangin, Mipi haw chuh a sumangthai puou a.

³⁵Nam dangte tawh a kichênghel u a, A thilhih hawu chuh a zil u a.

³⁶A milim pathien teu na a sem zawu a; Zie chuh amau dingin thâng a hung hi ta a:

³⁷Thithate kawm a chun a chanu teu a chapateu in a kithawi u a,

³⁸Sietna neilote thisan, a chanuteu leh a chapateu thisan ngêi chuh a suoh tau a, Ziehaw chun Kanaan gama milimte kawmah a kithawi u a; Zie gam chuh thisan in a hung buok ta a.

³⁹Khutichun a nasephawu ziek chun a kisubuok u a, A thilhih hawu a chun ana zawlsai tau a.

⁴⁰Zieziekchun LALPA chuh a mite chunga a lungnat na chuh a puok zak a, chun, A goluoh te chuh a kihdak ta a.

⁴¹Khutichun amau chuh namte khut ah a pie a; Amau haw mudahte chun a chung u ah vai a hawm tau a.

⁴²A melmate chun a sugimthei u a, A khutnuoi u a chun nemsieh in a um tau a.

⁴³Tamtak vei amau haw chu a hukdawk a; Himahlele a thiltup u chun a hel sek u a, A gitlohnau a chun hih niemin a um tau a.

⁴⁴Khuti nasan chun le amah chun, a kiko husau a het tieng leh A lungkham u chu a limsak a:

⁴⁵Amau haw ziekin a thuthun chu a hezing a, A zahngaih dân bang zelin a lungthim a kilehhei ta a.

⁴⁶Sala puih haw cheng chun Amau haw a lungsiet sak a.

⁴⁷Aw LALPA ka Pathien uh, ei hukdam inla, Namtin laka pan in ei puikhawm inla, Na min thiengtho chu ka pahchak theih na ding u leh, Na pahchakna sulopi ding in.

⁴⁸LALPA Israel Pathien chuh pahchak in um hen, Kumsawt apat kumsawt tiengin. Chun, mi chengin, “Amen,” tiu hen. LALPA chuh pakchau in.