Read Gangte SAM 107 Bible Online

SAM 107 - Gangte bible

SAM 107

¹Aw LALPA kieng ah kipah thu gen unla; amah chuh a pha ngâl a: A Zahngaihna chuh kumlekhuo’n um ding ahi.

²LALPA tatsate haw chun khutichun gen u hen, Buoina lak apat a tatte chun.

³Gamtin apat a puikhawm a, Sak leh thang sim leh mâl haw apat chun.

⁴Khenkhat chuh thalek gamgaw lampi haw achun a vak a vak u a; Mihing umna khuo mawng mawng a mu puou a.

⁵Gilkiel leh dangchâk in, A hinnau chuh a sunglam u ah a chau ta a.

⁶Zie tak chuleh a buoinau ah LALPA chu a uou u a, Amah chun a lungkhamnau a kipat chun a hukbit a.

⁷Mihing chênna khuo tun macheng un, Lamzang tak ah a pui ta a.

⁸Aw mihing chate hin LALPA chu a chit ziek leh, Mihing chate chunga a thilmak hih haw ziek in pakchau hen!

⁹Amah chun dangchâkte chuh a hih tai a, gilkielte chuh thilpha’n a hih vah sek hi.

¹⁰Khenkhat chu thim nuoi leh thihna lim ah a chuu a, Sukgimtheih leh kawlbuh sak in a um u a.

¹¹Pathien thu haw kalh in a hel u a, Chungnung pên pa lemguot chu a ngaihdau ziek un.

¹²Amah chun a lunggil u chu sepgim na’n a nemsieh a; A puk u a panpih ding mawng mawng a um puoh ngâl a.

¹³Zie tak chuleh a buoinau achun LALPA chuh uou un au, Amah chun a lungkham nau a kipat chun a hukdawk a.

¹⁴Thimnuoi leh thihna lîm apat chuh a puidawk a, A kannau haw chuh a hih tan ta a.

¹⁵Aw mi thiengtho haw hin LALPA chuh a phatna ziek leh, Mihing chate chunga a thilmak hihhaw ziek hin pakchau hen!

¹⁶Amah chun sumeng kawtkhakhaw chuh a hihsie a, A kamna thiktawn haw chuh a khên bawng ta ngâl a.

¹⁷Mingawl haw chu a kilekna ziek u leh, A manlohna ziekun a kisugimthei sek u a.

¹⁸A hinnau chun nek ding tin cheng hi a kihdak a; Thihna kulh kawtkhakhaw chu a naih sek u a.

¹⁹Zie tak chuleh a buoinau a chun LALPA chuh a uou u a, Amah chun a lungkhamnau apan chun a hukdam sek hi.

²⁰A thu chuh a sawldawk a, amau chu a hihdam sek a, A manthaina ding u a pan chun a humbit sek hi.

²¹Aw mihiemte hin LALPA chuh a phatna ziek leh, Mihiem chapate chunga a thilmak hihhaw ziek hin pakchau hen!

²²Amah chun kipahthu gen kithawihnahaw chu pie hen la, A thilhih haw chu kipahna lasa’n hilh u hen.

²³Khenkhat chuh Tuisuohgiet a kuonglien ah a kitawl u a, Tui lientak chung haw achun sumkawl a vei sek ui;

²⁴Ziehaw chun LALPA thilhih haw leh, Tui thuk taka a thilmak hihhaw chuh a mu sek ui.

²⁵Amah chun thu a pie a, huihpi a nung sek a, Zie chun a tui kinawk haw chuh a hih sang sek hi.

²⁶Van lam ah a kinawk to tul tul a, alithuk lam ah a lut suk kit zul zul sek a: Lungkhamna ziekin a hinnau a tuitha zo tai.

²⁷Zukham guol in a awn viel viel u a, a lawn chun chun u a, Umchin himhim a he sek puou hi.

²⁸Zie tieng chuleh a buoinau achun LALPA chuh a uou u a, Amah chun a lungzînnau a kipat chun a puidawk sek hi.

²⁹Huihpi chuh a suhai keia, Khutichun a tui kinawk haw a suthip kei sek hi.

³⁰Chun a haih ziek in a kipâk sek u a; Khutichun amah chun a utchak na mun uh kuong kaihmun achun a puilut sek hi.

³¹Aw, mihiemte kikhawpna ahin LALPA chuh a phatna ziek leh, Mihing chate chunga a thilmak hih haw ziek hin pakcha maizen leu chu aw!

³²A mite kikhawpna achun amah chuh pakchau henla, Upa haw kikhawpna achun amah chuh pakchau hen.

³³Amah chun luipi haw chu gamgaw a suok sak sek a, Tuinak haw chu tânggawchak a suok sak sek hi.

³⁴A gamsung a chêngte nunsiet ziekin gam gahsuoh chu gamgaw, chi gam a suok sak sek hi.

³⁵Thalek chu dîl a suok sak sek a, Gamgaw chu tuinak a suok sak sek hi.

³⁶Zie tak achun gilkielte a chen sak sek a, Chenna ding khuo a guonggalh sek ui.

³⁷Lo a nei u a, grep huon a bawl u a, A gah hung pung haw chuh a lo sek hi.

³⁸Amau haw chuh a vangsak sek a, khutichun nasa takin a hung pung sek u a; A gancha hawu chuh a kiem a phal puoh a.

³⁹Chun, nuoisiehnate, gimtheihnate, lungkhamnate, ziekin, A kiem hiei hiei u a, tawh niem ahung hitau hi.

⁴⁰Amah chun leng chate chung achun a lungnat na a sungtha sek a, Lampi himhim umlohna a chun amau chu vak chatvaih sak sek hi.

⁴¹Himahlele, tasam te chuh lungkhamna apat in munsang ah a khang to sek a, Ganhawn bangin inkawte a siem sak sek hi.

⁴²Mi diktatte chun zie chuh muu intin uh, kipâk un tin; Chun, mi nunsiete chun a kam uh a kihim tau hi.

⁴³Kuole a pil tapoh in ziehaw chuh vawp phan tin, LALPA chitna ngaihtuoh un au.