Read Gangte SAM 108 Bible Online

SAM 108 - Gangte bible

SAM 108

¹Ka lunggil hi a det hi, Aw Pathien ka lunggil hi a det ahi. La sa’ng ka ting, ahi, pahchakna la sa’ng ka, ka hinna hung halhdawk in.

²Pêkgit leh kingkangte haw, halh un: Kei chuh zingpi’n halh ing ka.

³Aw LALPA, namtin laka le kipahthu hun hilh ing ka: Namtin lak ah nang mah pakcha’n la sa’ng ka.

⁴Na zahngaihna chuh van khûp hiel in a nasa ngâl a, Na thutak chun vandum haw khu a supha hiel hi.

⁵Aw Pathien, nang chuh van haw khumkhel hiel khun limbawl in um inla: Na lopina chuh lei chung chengcheng chunga hin limbawl in um hen.

⁶Na deihtakte hi humbita a um theihna ding in, Na khut changlam in hukdam inla, ei dâwng in.

⁷Pathien in amun thiengtho achun hiti hin a gen a; Lawp ing ka ting Sekem khuo chuh hawmzak ing ka ting, Sukkoth phaicham chu hawmzak ing ka.

⁸Gilead chu keia ahi a; Manasseh chu keia ahi, Ephraim chule ka luchang humbitna ahi; Juda chule ka lal tiengkhut ahi.

⁹Moab chu ka kisilna bel ahi a; Edom achun ka kengtawbek paih ing ka ting: Philistia chu kiko khum ing ka.

¹⁰Khawpi kulh nei achun kuo a ei puilut ding? Edom lam ah kuo a ei pui ding?

¹¹Aw Pathien, nangin kei uh nei paih tha hilo maw? Aw Pathien, ka sepaihteu lak ah lah na hung kha ta puoh a.

¹²Ei dote suol dingin ei panpih inla: Mihiem kipanpihna chu banglo maimai ahi ngâla.

¹³Pathien vangin guolzo ing ka ting un. Amah chuh ei dote tawhden ding pên ahi ngâl a.