Read Gangte SAM 109 Bible Online

SAM 109 - Gangte bible

SAM 109

¹Aw ka pahchak Pathien, thipkêi ki’n la;

²Minunsie leh lepbawl hatte chun ka chungah a kam uh aka ngâl u a: Amau chun lei zuou thei in ka kawmah thu a gen u a.

³Hawtna thu’n ei um suok a, A ziek bei in ei do u a.

⁴Ka hehpih na chuh ei gensiet na’n a mang u a: Mahleh kei chuh amau a ding a paucham dingin ka kipie chak kêi hi.

⁵Amau chun thilpha chuh thil phalo in ei din u a, Ka hehpihna chuh muhdah na’n ei din u a.

⁶Nangin amau kalh dingin minunsie kawih inla: A khut changlam ah a hektu ding hen.

⁷Vaihawm saka a um tieng leh, thiemloh changin pawt hen la; A pauchamna chuh gitlohna a pawm hi hen la.

⁸A damsung ni haw chu tawm hen la; A lawiupa hihna chu mi dang chang hen.

⁹A chate chuh pa bei in um u hen la, A zi chuh meithai in um hen;

¹⁰A chate chuh vakchavai zing u henla, khutdawh u henla; A chênna gam u apat chun nawhdawk in um hen.

¹¹A sum batna teu chun a neih chengcheng chu lâksak u hen la; Malzin haw chun a sepgim gah chu kilak hen.

¹²A chunga zahngaihna latsak ding kuomah um kiu henla; Pa neilo a chate chuh a lainat ding kuomah um kiu hen.

¹³A suonte chuh satthak hi hen la; Khang nihna achun a min chuh thaihmang in um hen;

¹⁴A pate gitlohna chuh LALPA kieng ah hetzing in um henla; A nu gitlohna chuh thaihmang in um kihen.

¹⁵Ziehaw chuh LALPA âng ah chun um zing hen la, Amau haw hetzingna chu lei apat a a sukmang hi henla.

¹⁶Zahngaihna latsak na dân a he puoh a, Himahleh, mi gimthei, chagah leh thasie te thi hiela a sukgimtheih zawk ziekin.

¹⁷Ahi, mi sapsiet chu a utlam ahi a, tichun, hansie chuh a lu chung ah hungtung hen. Mi vangsak hi a kipah lam ahi puoh a, tichun amah tawh kigamla tak in a um a.

¹⁸Puonâk chuol a kivan tawbang in sapsietna’n a kivan a, Zie chuh a taksa ah tui bangin a lut a, A guhhaw achun sathau bangin a lut nalai a.

¹⁹Zie chuh amah a dinga ki-âk sek silhlechen bangin um hen la, A kigak zing na kâwnggak guolin nicheng in a kigak a.

²⁰Zie chuh ei kisuolpihte leh ka hinna gensiete, LALPA’n a ditthukna ahi.

²¹Himahlele aw Pathien, ka LALPA na min ziekin ei hehpih inla: Na zahngaihna a phat ziekin ei humbit in.

²²Gimthei leh chagah ka hi a, Ka lunggil hi ka sung ah sukliem in a um hi.

²³Nitâk lama lîm kiem lam tawbang hin ka kiemsuk a: Khaupepi bangin thin thak in ka um hi.

²⁴An ngawlh ziekin ka khûp haw hi a zawi zo a; Ka phehlevo hin thau himhim a pu ta puoi.

²⁵Amau haw gensiet ka na hi ta a: Ei muh poh poh u leh a luu a pei sek ui.

²⁶Aw LALPA ka Pathien, ei panpih inla; Aw na zahngaihna bang zel in nei hukdam in.

²⁷Ziehi na khut ahi tih a heu henla, LALPA, nang in na hih ahi tih a heu hen.

²⁸Amau in samsieu henla, himahleh, nang vang chun vangsak zaw’n la: Ei dote chuh muolpho u henla, mahleh na sawntawlawi vang chu lawp takin um hen.

²⁹Ei dote chuh zahchâkna puon silh sak in um u hen la, Puonâk a kituom guol in amau haw chuh muolpho na’n kituom u hen.

³⁰Ka kam hin LALPA kawmah kipahthu nasa takin gen ing ka; Ahi, mipi lak ah amah chuh pakcha’ng ka.

³¹Amah chuh mi chagah te changlam achun a ding a, Thi dinga mawhchansakte chuh hukdam dingin.