Read Gangte SAM 111 Bible Online

SAM 111 - Gangte bible

SAM 111

¹LALPA chuh pakchau in! Mi diktatte kihokhawmna leh kikhawp khâwmna achun Ka lungthim chengcheng in LALPA kieng ah kipahthu gen ing ka.

²LALPA thilhih haw chuh a lopi a, A chunga kipâk ta cheng in hawldawk ahi sek hi,

³A nasep chuh a lopi a, zahum na a dim ahi a: A diktatna chuh kumlekhuo a um ding ahi.

⁴Amah chun a thilmak hih haw chuh a hezing sek a: LALPA chuh mi lungsiet thei tak lainatna a dim ahi.

⁵Amah kihchate chuh nek ding a pie a: A thugawlh chuh kumlekhuo’n hezing in a.

⁶A thilhih in a thahat dân chuh a mite kieng ah a latsak a, Namtin go luoh ding chuh a pie a.

⁷A khut nasep haw chuh thutak leh diktak ahi a; A thupiek haw chengcheng chuh a muon-um hi.

⁸Ziehaw chuh kumlekhuo a ding in hihdet in a um a, Thutak leh diktaka hih dingin.

⁹Amân a mite kieng ah tatna a hun sawl a; A thuthun chuh kumlekhuo a ding in a guot a. A min chuh a thiengtho in a zahum hi.

¹⁰LALPA kihchak chuh chitna bul ahi; Khutibanga hih tapoh te chun hetthiemna a nei u a: Amah pahchakna chuh kumlekhuo a um ding ahi.