Read Gangte SAM 115 Bible Online

SAM 115 - Gangte bible

SAM 115

¹Aw LALPA, kei uh hilo in, kei mau haw ei pie lo in, Na min chu lopina pie zaw’n la, Na zahngaihna leh na thutak ziek in.

²Bangatih leh namtin in, “A Pathien uh khawi a um ahi?” a tih uh ahi die aw?

³I Pathien u chuh van ah a um ngâl a: A ut taphawt a hih a.

⁴A pathien chu dangka leh sana ahiu a, Mihiemte khut suok ahiu hi.

⁵Kam a nei u a, himahleh, a pauthei puoh ngâl u a; Mit a nei u a, himahleh, a mu thei puoh ngâl u a;

⁶Bil a nei u a, himahleh, a za thei puoh ngâl u a; Nak a nei u a, himahleh, a gim a he thei puoh ngâl u a;

⁷Khut a nei u a, himahleh, bangmahcha a khawih thei puoh ngâl u a; Keng a nei u a, himahleh, a chieh thei puoh ngâl u a; A gawl u ale aw gi a um diek puoh a.

⁸Ziehaw siemte chu ziehaw bangmah chun um un au; Ahi, amau gingcha ta cheng chuh.

⁹Aw Israel, LALPA chuh gingcha’n: Amah chuh amau haw panpihpa leh a phawu ahi.

¹⁰Aw Aron inkawte haw, LALPA chuh gingchau un: Amah chuh amau haw panpihpa leh a phawu ahi.

¹¹LALPA kihchate haw, LALPA chuh gingchau in: Amah chuh amau haw panpihpa leh a phawu ahi.

¹²LALPA chun ei uh ei hezing a, ei vangsak in a: Israel inkawte chu vangsak intin; Aron inkawte chuh vangsak in a.

¹³LALPA kihchate chuh vangsak ina, A lien a neu in.

¹⁴LALPA chun hun hihpung deuh deuh hen la, Nangmau haw leh na chateu tawh.

¹⁵LALPA vangsakna mute na hiu hi, Amah chuh lei leh van siempa ahi.

¹⁶Van haw khu LALPA vante ahi a; Lei chung vang hi chu mihiem chate a piek ahi.

¹⁷Mithite chun LALPA chuh a pakcha puou a, Mun thip a chieh suk ten le a pakcha puou hi.

¹⁸Himahleh, eihaw vang in LALPA chuh pakchai ting un Tu a kipatin kumlekhuo’n. LALPA chuh pakchau in.