Read Gangte SAM 118 Bible Online

SAM 118 - Gangte bible

SAM 118

¹Aw LALPA kawmah kipahthu gen unla; amah chuh a pha ngâl a: A zahngaihna chuh I chung u ah a nasa ngâl a;

²A zahngaihna chuh kumlekhuo’n um ina tih, Israel chun tu’n gen hen.

³A zahngaihna chuh kumlekhuo’n um ina tih, Aron inkawte chun tu’n gen u hen.

⁴A zahngaihna chuh kumlekhuo’n um ina tih, LALPA kihchate chun tuhin gen u hen.

⁵Ka lungzînna a kipatin LALPA chuh ka sama; LALPA chun ei dâwng a, mun awngthawl tak ah ei um sak ta a.

⁶LALPA chuh kei lama pang ahi; lau puo’ng ka: Mihing in bang ei lawh thei die?

⁷LALPA chuh kei lama pang, ei panpihte laka pang ahi: Zieziekchun ei mudahte chunga ka guolzawhna chu mu’ng ka ting.

⁸Mihing ginchak sangin, LALPA a ginna ngak hi a phazaw a.

⁹Lengte ginchak sang chun, LALPA a ginna ngak hi a phazawi.

¹⁰Namtin cheng in ei ûmkimvel u a: Amau haw chuh LALPA min in sumangthai ing ka.

¹¹Amau haw chun ei ûmkimvel u a, ahi ei um u a: Amau haw chuh LALPA min in sumangthai ing ka.

¹²Khuoipi bangin ei ûmkimvel u a, ling laka meikuong bangin a kuong u a: Amau haw chuh LALPA min in sumangthai ing ka.

¹³Ka pukna dingin hahpi’n nei sawn a: Himahlele LALPA chun ei panpih a.

¹⁴LALPA chuh ka hatna leh ka la ahi; Amah chuh ka hukdamna a hung hii.

¹⁵Ngaitie, kipahna leh hukdamna husa chuh mi diktatte puon-In ah a um sek a: LALPA khut changlam chun hangtak in a hih sek hi.

¹⁶LALPA khut changlam chu dawpsa’n in a um sek a: LALPA khut changlam chun hangtak in a hih sek hi.

¹⁷Thi puo’ng ka ting, ahi, dam ing ka ting, LALPA thilhihte chuh hetsak zawng ka.

¹⁸LALPA chun nasatak in ei sawi a: Mahleh thihna kieng hiel achun ei pie puoi.

¹⁹Diktatna kulh kawtkhakte hi ei hawn sak unla: Zie chun lut ing ka ting, LALPA kieng ah kipahthu gen ing ka.

²⁰Ziehi LALPA kawtkhak ahi; Mi diktat chuh lut un au.

²¹A kawmah kipahthu gen ing ka, Nang in nei dâwn ziekin, Nang chuh ka hukdampa na na hi a.

²²In sate suong deih loh khah a ning a suong phachuom pên ana hi tai.

²³Zie chuh LALPA hih ahi; I mitmuh un a mak hi.

²⁴Tuni ahi LALPA’n a siem ni chuh; Tuni hin kipâk hiting un lawp hitiu.

²⁵Aw LALPA ka hun ngên hi lungsiet takin ei hukdam in: Aw LALPA, lungsiet takin lawhtitna kei uh ei pie’n:

²⁶LALPA min a hung chuh a hamphai: LALPA In apat hin ka hun vangsak sek ui.

²⁷LALPA chuh Pathien ahi a, amah chun vak ei pie ta a: Kithawihna ding chu khauhuol in hen unla, maichâm ki ngêi a chun.

²⁸Nang chuh ka Pathien na hi a, kipahthu hun hilh ing ka ting: Ka Pathien na hi a, hun limbawl ing ka.

²⁹Aw LALPA kawmah kipahthu gen unla; amah chuh a pha ngâl a. A zahngaihna chuh kumlekhuo’n um ding ahi ngâl a.