Read Gangte SAM 119 Bible Online

SAM 119 - Gangte bible

SAM 119

¹Lampi haw a mipha bukimte chuh a hamphau ui, LALPA dân hawhte chuh.

²A thu hetsak zuite chuh a hamphau ui, Lungthim chengcheng a amah hawlte chuh.

³Ahi, amau chun diktatlohna himhim ahih puou a; A lampi achun a chieh sek u a.

⁴Nang in thununna thu haw chuh thupiek in nei pie a, Phachuomngai taka ka zuih theihna ding in.

⁵Aw na thuguot te chuh zui ding in, Ka umdan haw hi hihdet in um le aw!

⁶Zie tieng chuleh zahhuoi lo ding ka hi a, Na thupiek chengcheng ka khawksak tieng leh.

⁷Lungthim diktak pu’n kipahthu hun hilh ing ka, Na vaihawmna diktatte ka zuih tieng leh.

⁸Na thuguot haw chuh zui ing ka; Aw ei taihsan den ki’n la.

⁹Khangdawng in bangti’n a umdan a hih thiengtho thei die! Na thu bang zel a umdan venphat in.

¹⁰Ka lunggil chengcheng hin ka hun hawl a; Aw, na thupiekte apan a ka taihmang chuh phal hiel ki’n.

¹¹Na chunga thil ka hih khelh lohna dingin, Na thu chuh ka lunggil ah ka khawlkhawm a.

¹²Aw LALPA, pahchak in um in; Na thuguot haw chuh ei sinsak inla.

¹³Na kama na vaihawm pawt chengcheng chu Ka mûk in ka hetsak tai,

¹⁴Na thu hetsak lam achun ka lawp a, Neih zawhna chengcheng a ka lawp bang phet in.

¹⁵Na thuguot chung achun kipâk ing ka ting, Na lampite le limsak ing ka.

¹⁶Na thuguot te chung achun kipâk ing ka ting: Na thu chuh hengilh puo’ng ka.

¹⁷Ka hin theihna dingin na suok chunga hin phatak in hih in; Khutichun na thu’n nung ing ka.

¹⁸Na dân thu a kipat thilmak ka muh theihna din Ka mit haw hi ei hihvak sak in.

¹⁹Lei a hin malzin ka hi a: Na thupiek haw chuh îm ki’n la.

²⁰Ka hinna hi kek gawp in a um a, Hun chenga na vaihawmte a utchak ziek in.

²¹Mi kiletsak sapsieta umte chu na hilhgaih a, Na thupiekte vakmangsan sek haw chuh.

²²Gensietna leh muhsitna hi ka kienga pat lamang inla; Na thu hetsakhaw chuh ka zui ngâl a.

²³Milien haw le a chuu a, ei niel u a; Himahlele na sawntawlawi hin na thuguot haw chu a ngaihtuoh zaw a.

²⁴Na thu hetsak chu ka kipahna ahi, Lem ei guot sakte le ahiu hi.

²⁵Ka hinna hi leivui ah a bek chak kêi a: Na thu bang zel in ei suhalh inla.

²⁶Ka umdan haw chuh ka hun hetsak a, nang nei dâwng a: Na thuguot haw chuh ei sinsak in.

²⁷Na thununna lam chuh ei hetthiem sak inla: Khutichun na thilmak hih haw thu chu ngaihtuoh ing ka.

²⁸Ka hinna hi lungkham ziekin a zun mang sek a: Na thu bang zel in ei hih hât in.

²⁹Thil diklo hi ka kawma pat kawihmang inla: Na lungsietna dân ei sinsak in.

³⁰Umdan muon-umna lampi ka tel a: Na vaihawmte ka masangah ka umsak a.

³¹Na thu hetsakhaw hi ka tuchak kêi a: Aw LALPA, ei muolpho sak ki’n.

³²Na thupiek lama chun tai ing ka ting, Ka lunggil hi na hihlet tak chuleh.

³³Aw LALPA na thuguot lampi chuh ei sinsak inla; Khutichun a tâwp chanin zui ing ka.

³⁴Hetthiemna ei pie’n la, tichun na dân chuh vawppha ding hi’ng a. Ahi, ka lunggil chengcheng hin zui ing ka.

³⁵Na thupiek lampi ah ei pui in; Zie chun ka kipâk ngâl a.

³⁶Na thu hetsak lama chun ka lunggil hi thet sak inla; Zie achun ka kipâk ngâl a.

³⁷Thil thu dukdak lo en lo ding in ka mit ei hêi sak inla, Na lampi achun hinna ei pie’n.

³⁸Na thutiem chuh na sawntawlawi kawma hin hih det inla, Zie chuh nangmah hun kihchate ding ahi.

³⁹Mi gensietna ka lauh hi lamang inla; Na vaihawm haw chuh a pha ngâl a.

⁴⁰Ngaitie, na thununna thu haw chu het ka ut sek a; Na diktatna ziekin hinna ei pie’n.

⁴¹Aw LALPA, na zahngaihna thu haw chu ka kieng ah hung hen la, Na hukdamna ngêi chuh, na thutiem bang zel in.

⁴²Khutichun ei gensiete dawnna ding nei ing ka; Na thu ka gingcha ngâl a.

⁴³Chun, thutak thu chuh ka kam a pat hin ladawk suok kêi ki’n la; Na vaihawm haw achun ka kinem ngâl a.

⁴⁴Khutichun na dân chuh zui ing ka, Kumlekhuo chan in.

⁴⁵Chun, zalen takin leng ing ka ting; Na thununna thu haw chuh ka hawl ngâl a.

⁴⁶Na thu hetsak thu haw chuh lalte masang ah gen ing ka ting, Zakcha dawi puo’ng ka.

⁴⁷Chun, na thupiek ka ngaihnat na ziek chun, kipâk ing ka.

⁴⁸Na thupiek ka ngaihnat na lam achun, ka khut zak ing ka ting; Na thuguot haw chuh ngaihtuoh ing ka.

⁴⁹Na sawntawlawi kawma thutiem chu he zing inla, Nang in nei kinep sak ziek in.

⁵⁰Ziehi ka gimtheihna ale ka thamuonna ahi: Na thu chun ei suhalh ta ngâl a.

⁵¹Kisatheite’n nasa takin ei nuihsan u a: Himahlele na dân chuh ka chieh mangsan puoi.

⁵²Aw LALPA, malai pek a na vaihawm haw ka hezing a, Ka kithamuon sek hi.

⁵³Lunghihlohna nasa takin ei sunkhum ta a, Minunsie na dân taihsan haw ziekin.

⁵⁴Ka khuolzinna In ahin, Na thuguot haw chu ka la ahi sek.

⁵⁵Aw LALPA, zan leh na min ka hezing sek a, Na dân le ka zui sek hi.

⁵⁶Vangsakna chuh ka chungah a chu a, Na thununna thu haw chuh ka vawpphat ziek in.

⁵⁷LALPA chuh ka chanvo ahi a: A thu haw zui dingin thu ka tiem a.

⁵⁸Ka lunggil chengcheng in na lungsietna ka ngên a: Na thu bang zel in ei lungsiet inla.

⁵⁹Ka lampi haw ka ngaihtuoh a, Na thu hetsak lama chun ka kal ka suon ta a.

⁶⁰Na thupiek haw zui ding in, Ka kin a, sawt ka hal puoi.

⁶¹Minunsiete khauhuolhaw chun ei zemchal zing a; Himahlele na dân chuh ka hengilh puoi.

⁶²Zan lai inle kipahthu hun hilh dingin tho ing ka, Na vaihawm diktat ziekin.

⁶³Nang hun kihcha chengcheng leh, Na thununna thu te zui haw lawite ka hi.

⁶⁴Aw LALPA, lei chung hi na zahngaihna a dim ahi: Na thuguot haw chuh ei sinsak inla.

⁶⁵Aw LALPA, na thu bang zelin, Na suok hi na hihpha zel a.

⁶⁶Ngaihtuoh thiemna leh hetna ei sinsak inla; Na thupiekte chuh ka taksang ngâla.

⁶⁷Hih gimtheih a ka um makhan ka vakmang sek a; Tuhin vang chuh na thu ka zui tai.

⁶⁸Nang chuh na pha a, thilpha na hih a; Na thuguot haw chuh ei sinsak in.

⁶⁹Pathien neilote chun ka chungah zuou a phuok kawm u a: Ka lunggil chengcheng hin na thununna thute chu vawppha’ng ka.

⁷⁰A lunggil u chu sathau bang in a thau a; Himahleh, kei vang na dân chungah ka kipâk sek hi.

⁷¹Na thuguot te chuh ka zil theihna ding in; Hih gimtheih a ka na um kha kei dingin a pha ahi.

⁷²Sana leh dangka sang tampi sang in, Na kama dân pawt chu kei dingin a pha zawi.

⁷³Na khut in nei siem a nei tundawk ahi; Na thupiek haw chuh ka sin theihna dingin hetthiemna ei pie’n.

⁷⁴Nangmah kihchate chun ei muu intin uh, kipâk un au; Na thu a ka kinep sek ziekin.

⁷⁵Aw LALPA na vaihawm chuh a diktat hi tih leh, Nang in muon-um takin nei sugimthei hi tih ka hêi.

⁷⁶Na sawntawlawi kawma na tiem bang zel in, Lungsiet takin na zaidawhna chuh ka thamuonna ding hi hen.

⁷⁷Ka hin theihna dingin na zahngaihna chuh ka kieng ah hung hen la: Na dân chuh ka kipahna ahi ngâl a.

⁷⁸Pathien neilote chuh muolpho takin um u henla; diklo tak in ei nuoisieh ta ngâl u a: Himahlele ken vang na thununna thu haw chu ngaihtuoh ing ka.

⁷⁹Nang hun kihchate chuh kei lam hung ngau hen, Tichun na thu hetsak te chu he ding hiveu in.

⁸⁰Ka muolpho loh na ding in; Ka lungthim hi na thuguot haw achun phabukim in um hen.

⁸¹Ka hinna hi na hukdamna ngai in a chau ta a, Himahlele na thu’n ka kinem sek hi.

⁸²Na thu etna’n ka mit a vai zo ta a, “Nangin bangtik a ei thamuon ding na him?” ka ti sek hi.

⁸³Meikhu thût savun um tawbang ka na hi ta ngâl a; Himahlele na thuguot haw chu ka hengilh puoi.

⁸⁴Na sawntawlawi kum ding chan hi bang zat ahi dem? Ei simmawh haw chunga hin bangtik leh vaihawm ding na him?

⁸⁵Mi chapo na dân banga umlo haw chun, Ka kiekna dingin kawkhuk a lai u a.

⁸⁶Na thupiek chengcheng a muon-um hi: Amau chun diklo takin ei simmawh sek u a; ei panpih in.

⁸⁷Amau chun lei a hin ei sumang vang vang u a; Himahlele na thununna thu haw chu ka kiheisan diek puoi.

⁸⁸Na zaidawhna bang zel in ka hinna vengbit inla; Khutichun na kama thu hetsakhaw chuh zui ding hi ve’ng in.

⁸⁹Aw LALPA, kumlekhuo a dingin, Na thu chuh van ah dettak in a um a.

⁹⁰Na muon-umna chu suon chengcheng tieng in a um a: Lei hi na hih det a, dettak in a um zing hi.

⁹¹Ziehaw chuh tuni hin na vaihawmte bangin a um zing u a; Thil chengcheng chu lah na sawntawlawi te ahi chiet u a.

⁹²Na dân chuh ka kipahna hi kile chuh Ka gimtheihna a khan beimang ding hita ve’ng.

⁹³Na hilhgaihna thu haw chu bangmah tikin hengilh puo’ng ka. Nang in ziehaw chun nei hih halh ta ngâl a.

⁹⁴Nanga ka hi, ei hukdam inla; Na hukdamna thu haw chu ka hawl ngâl a.

⁹⁵Minunsiete chun ei sukmang guo’n ei ngak sek u a; Himahlele na thu hetsakhaw chu ka ngaihtuoh hi.

⁹⁶Phatbukimna chengcheng tawpna chu ka mu ta a; Ahi, na thupiek chuh a lopi mah mah hi.

⁹⁷Aw na dân hi ka ngaina na mai zên e! Nichang tum a ka ngaihtuoh sek ahi.

⁹⁸Na thupiek haw chun ei dote sanga ching zaw’n ei siem a; Kumlekhuo a ka kawma a um zing ziekin.

⁹⁹Ei sinsak haw chengcheng sangin chitna ka nei tam zaw a; Na thu hetsakhaw hi ka ngaihtuoh a hih sek ziek in.

¹⁰⁰Teksie haw sangin ka hethiem zaw a, Na thupiek haw hi ka vawpphat ziek in.

¹⁰¹Na thu ka vawp theihna dingin Lampi phalo himhim a khun ka kênghaw hi suon ka phal puoi.

¹⁰²Na vaihawmna apat chun ka pet kha puoi; Nang nei sinsak ziek in.

¹⁰³Na thu haw hi ka kam a ding chun a thum na zên e! Ahi, ka kama ding chun khuoizu sangin a thum zawi.

¹⁰⁴Na hilhgaihna thu haw ziekin hetthiemna ka nei sek a: Zieziekchun umdan diklo tin cheng hi ka hâwi.

¹⁰⁵Na thu hi ka kenga dingin thaumei ahi a, ka lampi a ding in vak ahi.

¹⁰⁶Na vaihawmna diktatte zui dingin, Ka kihâksiela, ka hihdet tai.

¹⁰⁷Hahpi a hih gimtheih in ka um a: Aw LALPA na thu bang zel in ei hih halh inla.

¹⁰⁸Aw LALPA ka hun pahchakna hi ei pawm sak inla, Na vaihawmnate chu ei sinsak in.

¹⁰⁹Ka hinna hi ka khut ah a um zing ngâl a; Himahlele na dân chuh ka hengilh kha puoi.

¹¹⁰Minunsiete’n ka awkna dingin thâng a kam u a; Himahleh na hilhgaihna thute ka vakmangsan kha puoi.

¹¹¹Na thu hetsakte chuh kumlekhuo a go luoh dingin ka la a; Ahi, amau chuh ka lungthim kipah sak ahi ngâl u a.

¹¹²Kumlekhuo’n a tâwp tiengin, Na thuguot te tawbanga hih dingin ka lungthim ka ngat sak a.

¹¹³Lungthim thuoh nei mi haw chuh ka haw a; Himahleh, na dân vang chuh ka ngaina a.

¹¹⁴Nang chuh ka kiselgukna mun leh ka phaw na hi: Na thu ah ka kinem hi.

¹¹⁵Nang haw thil phalo hih te haw, ei taihsan un; Ka Pathien thupiekte ka vawpphat theihna dingin.

¹¹⁶Ka hin theihna dingin na thu bangin ei tung zang inla, Ka kinepna chunga hin zakcha’n ei umsak ki’n.

¹¹⁷Ei kai inla, tichun bit ing ka, Na thuguot haw chuh khawksa zing ding ka hi.

¹¹⁸Na thuguot haw a pata vakmang chengcheng chuh na musit a; A hun lepbawlnau chuh zuou ahi ngâl a.

¹¹⁹Lei a mi nunsie haw chengcheng chuh bangkhat tui-êk tawbang in na hih mang sek a; Zieziekchun na thu hetsak haw chu ka ngaina ahi.

¹²⁰Ka phehlevo hi nangmah kihcha’n a kilîng a; Na vaihawmna chu ka lau ngâl a.

¹²¹Vai ka hawma diktat takin ka hih sek; Ei nuoisieh haw lak ah ei thahthawt ki’n la.

¹²²Na suok chung thu ah aphatna dingin bulsu’n la; Mi chapo ten ei nuoisieh kiu hen.

¹²³Na hukdamna thîlna’n ka mit a vai zo tai, Na thu diktat thîlna’n tawh.

¹²⁴Na zahngaihna bang zelin na suok chunga hin hih inla, Na thuguot haw chuh ei sinsak in.

¹²⁵Na suok ka hi a, hetthiemna ei pie’n; Na thu hetsakhaw chuh ka het theihna dingin.

¹²⁶Na dân hi bangmah lo a siem tâk ziekun; LALPA tuhi nang nasep hun ahi tai.

¹²⁷Zieziekchun na thupiek chuh sana sang in ka ngaina a, Ahi, sana thiengtho sang inle.

¹²⁸Zieziekchun lampi tin chengah na hilhgaihna thu chengcheng chuh dik in ka he a; Umdan diklo tin cheng hi ka hâwi.

¹²⁹Na thu hetsak chuh a mak a: Zieziekchun ka hinna hin a vawppha sek hi.

¹³⁰Na thu hilhchet hin mite a suvak a; Mi mawl haw chuh a hetthiem sak sek hi.

¹³¹Ka kam ka kalien a, ka ha hut hut a; Na thupiek chuh ka lunggel ziekin.

¹³²Kei lam hung nga’n la, ei lungsiet inla, Na min ngainate na lungsiet bang khan.

¹³³Ka kalsuon haw hi na thu’n hihdet inla; Gitlohna mawng mawng ka chungah thu neih sak ki’n.

¹³⁴Mihiem kinuoisiehna apat chun ei humbit inla: Khutichun na hilhgaihna thu haw chuh zui ing ka.

¹³⁵Na mel in na suok salhvak inla; Na thuguot haw chuh ei sinsak in.

¹³⁶Ka mittui hi lui tui tawbang in a luong tha a, Na dân a zuih loh ziek un.

¹³⁷Aw LALPA nang chuh diktat na hi, Na vaihawm haw le a dik hi.

¹³⁸Na thu hetsakhaw chuh diktat tak leh Muon-um mah mah in thu na pie a.

¹³⁹Ka phatchuomngaihna hin ei sumangthai ta a, Ei dote’n na thu a hetngilh tâk ziek un.

¹⁴⁰Na thu hi a thiengtho mah mah mai hi; Zieziekchun na suok hin a ngaina ahi

¹⁴¹Mineu leh mi muhsit ka hi a: Mahleh na hilhgaihna thu haw chuh ka hengilh kha puoi.

¹⁴²Na diktatna chuh kumlekhuo diktatna ding ahi a, Na dân le thutak ahi.

¹⁴³Lungkhamna leh thavaihna chun ei sunkhum ta a: Himahlele na thupiek haw hi ka kipahna ahi.

¹⁴⁴Na thu hetsakhaw chuh kumlekhuo a dingin a diktat hi. Hetthiemna ei pie’n la, tichun hing zing ing ka.

¹⁴⁵Ka lunggil chengcheng in ka hun sama; aw LALPA ei dâwng inla: Na thuguot haw chuh vawp pha’ng ka.

¹⁴⁶Ka hun sam sek a; ei hukdam inla, Chun na thu hetsakhaw chuh zui ding hi ve’ng.

¹⁴⁷Phalvak masang in ka tho a, panpih ngenin ka uou sek a: Na thu haw chuh ka kineppih sek hi.

¹⁴⁸Na thu ka ngaihtuoh theihna ding in, Zan ven hunbi masang in ka mit ka hak tai.

¹⁴⁹Na zaidawhna bang zel in ka aw hi ngaitha’n la: Aw LALPA, na vaihawm haw bang zel in ei hih halh inla.

¹⁵⁰Ngaihtuohna nunsie zui hawn a hun naih u a; Amau haw chuh na dân gamlatna a um ahiu.

¹⁵¹Aw LALPA, nang chuh na nai a; Na thupiek cheng chu thutak ahi.

¹⁵²Malaia, na thu hetsakhaw a kipatin, Ziehaw chuh kumlekhuo a dingin na hihdet tai tih ka na he tai.

¹⁵³Ka gimtheih zie hi ngaihtuoh inla, ei humbit in; Na dân chuh ka hengilh ngei puoh ngâl a.

¹⁵⁴Ka thu ei genpih in, ei tan in: Na thu bang zel in ei hih halh inla.

¹⁵⁵Hukdamna chuh minunsiete apat a gamlai; Na thuguot haw chuh a hawl loh ziek un.

¹⁵⁶Aw LALPA na zahngaihna chuh a nasa ie: Na vaihawmna haw bang zel in hinna ei pie’n.

¹⁵⁷Ei hihduhdahte leh ei dote chu tampi ahiu a: Himahlele, na thu hetsakhaw chu ka chiehmang san kha puoi.

¹⁵⁸Gukhah taka hih haw chu lung-awi lo takin ka en a, Na thu a zawp loh ziek un.

¹⁵⁹Na hilhgaihna haw chuh ka ngaihnat zie ngaihtuoh inla; Aw LALPA na zaidawhna zie bang zel in ei suhalh in.

¹⁶⁰Na thu kigawmkhawm chuh thutak ahi; Na vaihawmna diktat te chuh kumlekhuo’n um zing in a.

¹⁶¹Leng chate chun a ziek bei in ei suduhdah u a; Himahlele ka lunggil chun na thu haw hi ahi a lauh chuh.

¹⁶²Na thu haw ahin ka lawp hi, Thil lopi tak gâllâk a mu tawbang in.

¹⁶³Zuou hi ka hawa, ka kihdak hi, Na dân vang chuh ka ngainai.

¹⁶⁴Ni khat in sagih vei ka hun pakcha sek hi, Na vaihawmna diktat ziek in.

¹⁶⁵Na dân ngaina haw chun thamuonna nasa tak a mu sek ui; Pukna himhim a nei puou hi.

¹⁶⁶Aw LALPA, na hukdamna ka kinem zing a, Na thupiek haw guol in ka hih sek hi.

¹⁶⁷Ka hinna hin na thu hetsakhaw chuh a zui sek a; Ka ngaina mah mah mai hi.

¹⁶⁸Na hilhgaihna thu haw leh na thu hetsak haw chuh ka zui sek a; Ka lampi chengcheng hi na masanga um ahi ngâl a.

¹⁶⁹Aw LALPA, ka hun uou husa hi na masangah hung tung henla; Na thu bang zel in hetthiemna ei pie’n.

¹⁷⁰Lungsiet ka ngetna hi na masangah tung hen la, Na thu bang zel in ei humbit in.

¹⁷¹Ka mûk hin pahchakna thu gen hen la; Nang in na thuguot haw chuh nei sinsak sek ziek in.

¹⁷²Ka lei hin na thu pakcha’n la sa hen la; Na thupiek chengcheng chu a dik ziek in.

¹⁷³Na khut chuh ei panpih dingin kisazo sa’n um hen la; Na hilhgaihna thu haw chuh ka tel ngâl a.

¹⁷⁴Aw LALPA, na hukdamna thu haw chuh ka utcha sek a; Na dân chuh ka kipahna ahi.

¹⁷⁵Ka hinna hi hing hen la, tichun hun pakcha ding hi ve’n; Na vaihawmna haw’n le ei panpih hen.

¹⁷⁶Belam mang tawbang in ka vakmang a; na suok hi hawl inla; Na thupiek haw chu ka hengilh ngei puoh ngâl a.