Read Gangte SAM 132 Bible Online

SAM 132 - Gangte bible

SAM 132

¹LALPA, David chuh a gimtheih thuokna chengcheng hezing inla;

²LALPA kawmah a kihâksiel a, Jakob mihat kawma thu a tiem zie khah:

³“Ka umna in ah lut hiel puo’ng ka ting, Ka zalkhun a le kal hiel puo’ng ka;

⁴Ka mitte hi sin phal puo’ng ka ting, Ka mitvun hile vuo’n sak phal diek puo’ng ka;

⁵LALPA mun ding ka hawldawk masang sieh chuh, Jakob Pathien hât In ding chuh,” ti’n.

⁶Ngaitie, a Thugawlh chanchin chu Ephrath ah I heu a: Jearim gammâng lak achun I mu tau a.

⁷Amah umna mun achun lut hiting un; A keng ngakna bul a chun ho hitiu.

⁸Aw LALPA, kipan inla, na chawlhmun ding achun lut inla; Nang leh na Pathien bawm tawh.

⁹Na thiempute chu diktatna’n kivan u hen la; Na mi thiengthote chu lawp in kiko u hen.

¹⁰Na sawntawlawi David ziek in Na sathau nuh mel chuh kilehhei sak kit dah in.

¹¹LALPA chun David kawmah a kihâksiel ta a; Zie chuh kilehheisan puo’n a: “Na chapate laka khat na lalchutphah a chun chut sak ing ka.

¹²Na chate chun na thugawlh leh, Ka thu hetsak, amau haw ka sinsak ding chuh a zawp u chun, A chateu le kumlekhuo’n na lalchutphah achun chu zel un au,” ti’n.

¹³LALPA chun Zion chuh a tel ngâl a; A chênna dingin a deih a.

¹⁴“Zie hi kumlekhuo a ka chawlhna mun ding ahi: Zie hin um zing ing ka; ka deihlam ahi ngâl a.

¹⁵A nek ding chuh kiting takin vangsak ing ka ting: A mi chagahte chuh chângthâk in sulungawi ing ka.

¹⁶A thiempute chuh hukdamna’n thuom ing ka ting: A mi thiengtho haw chuh kipâk takin kiko un au.

¹⁷Zie tak a chun David ki chuh seldawk sak ing ka: Ka sathau nuh a ding in thaumei ka guot ta a.

¹⁸Amah dote chuh muolpho na’n thuom ing ka ting: Mahleh, amah chung achun a lallukhuk chu val sitset in a,” ti’n.