Read Gangte SAM 135 Bible Online

SAM 135 - Gangte bible

SAM 135

¹LALPA chuh pakchau un, LALPA min chuh pakchau inla; Aw, LALPA suokte, amah chuh pakchau in:

²LALPA In a ding a, I Pathien uh In huongsung inmai a dingte haw, Amah chuh pakchau un.

³LALPA chuh pakchau un; LALPA chuh a pha ngâl a: A min pakcha’n la sau un; a nuom ngâl a,

⁴LALPA chun Jakob chuh amah dingin a tel ngâl a, Israel hi a go ding chuom in a tel a,

⁵LALPA chuh lopi tak ahi tih leh, LALPA chuh Pathien chengcheng sang in a chungnung zawi tih ka he ngâl a.

⁶LALPA chun a nawp taphawt chu a hih sek hi, Van ale, lei a le, tuisuohgiet a le, tui thuk tak haw chengcheng ale,

⁷Amah chun meipite chu kâwlmawng a kipatin a chieh toh sak sek a; Kawlphe haw le guoh dingin a siem sek a; A thil kawihkhawmna In a kipan chun huih a ladawk sek hi.

⁸Amah chun Aigupta gama cha lutîl haw chu a hihlum a, Mihiem leh sate le.

⁹Aw Aigupta gam, amah chun tiemtehna te leh thilmakte na sung ah a hun sawl a, Pharaoh leh a sawntawlawi te chengcheng chung achun.

¹⁰Amah chun nam tampi a hihlum a, Lal lopi tak tak haw a that a;

¹¹Sihon, Amor te lal leh Og, Bashan lal Kanaan gama lalgam chengcheng chuh:

¹²A gam chuh gochan ding in a pie a, A mi Israel go chan ding in.

¹³Aw LALPA na minthanna chu kumlekhuo’n um intin; Aw LALPA nang mah hetzingna chu khang um lai chan in um zing in a.

¹⁴LALPA chun a mihaw chuh vaihawm sak in, A sawntawlawi te chung thu a chun a lungthim chu kilehhei ding ahi ngâl a.

¹⁵Namte milim pathien chu sana leh dangka ahiu a, Mihiem khutsuok ahiu hi.

¹⁶Kam a nei u a, himahleh, a pauthei puou a; Mit a nei u, himahleh, a mu thei puoh ngâl u a;

¹⁷Bil a nei u a, himahleh, a za thei puou a; A kam u a le hu a um diek puoi.

¹⁸Ziehaw gingcha taphawt te leh ziehaw siemte chu amau haw guol chun um u hen.

¹⁹Aw Israel inkawte haw, LALPA chuh pakchau in: Aw Aron inkawte haw, LALPA chuh pakchau in:

²⁰Aw Levi inkawte haw, LALPA chuh pakchau in. LALPA kihchate haw, LALPA chuh pakchau in.

²¹LALPA chuh Zion apat in pahchak in um hen la, Jerusalem a umpa chuh. LALPA chuh pakchau in.