Read Gangte SAM 139 Bible Online

SAM 139 - Gangte bible

SAM 139

¹Aw LALPA, nang in nei hawl ta a, nei he tai. Nangin ka chut leh ka din hi na he sek a,

²Ka ngaihtuohna hi gamla taka kipan inle na hethiem sek a.

³Ka chieh leh ka kuol hi nei en gunchuh sek a, Ka umdan chengcheng hi na he suok kêi a.

⁴Ngaitie, aw LALPA, Nang in na hetsuok kei loh chuh, Ka lei a hin thu mawng mawng a um puoi.

⁵Nang in ka nung leh ma ah nei um suok a, Ka chungah na khut na nga a.

⁶Khuti zozai a hetna chuh kei ding in a mak taluoi; A sang bêk a mu phalo ka hi.

⁷Na thagau a kipat hin khawitak ah ka chieh dem? Na maa kipat hin khawitak ah ka taimang dem?

⁸Van ah zu kal leng, zie tak achun na um ngâl a: Sheol a chun kuolna bawl mahleng, ngaitie, zie chun le na um zel ngâl a.

⁹Zing tha zak in, tuisuohgiet tâwp pên ah va um leng le;

¹⁰Zie a chun le na khut in nei pui in na tin Na khut changlam in ei tu ding na hi ngâl a.

¹¹Ka kimvela eng hi zan thim hi hen la, Thawnlo in thim in ei khuh zo hen, ti mahleng le;

¹²Thim nasan inle nang apat chuh bangmah a lieh puoh a, Mahleh zan hi sun tawbang in a vak zawi: Nang ding chun thim le vak hi kibang ahi.

¹³Ka sunga um haw cheng hi nangin na siem ahi a; Ka nu sûla ka um lai in nei mêk mat vek a.

¹⁴Na kieng ah kipahthu gen ing ka; lauh-um tak leh maktak a siem ka hih ziekin: Na thilhih haw hi maktak ahi; Zie chuh ka hinna hin a hechien ten hi.

¹⁵A gûka siem a ka um a, Lei mun nuoinung pena kilawm taka siem a ka um lai khan, Ka guh le chângte hi nang apat in sel in a um puoi.

¹⁶Ka duong ana kimlo chuh na mit in a mu a, Na lehkhabu achun ka tibâk chengcheng zik suok kêi ahi a, A ni a ni’n siem in a um zel a, khatchale a um nailoh lai in.

¹⁷Aw Pathien, na ngaihtuohna haw chuh kei a dingin a lul na mai zên e! A kigawmkhawm chuh a nasa na mai zên e!

¹⁸Sim ding hi leng a tam dân chuh pîlnel sangin a tam zawi: Ka hung khanlawh leh, na kienga um ka hi zing zieng sek hi.

¹⁹Aw Pathien minunsie chuh that ngêi in la: Khutichun nang haw thisan suohhat mite haw, ei taihsan un.

²⁰Amau chun nunsie tak in a hun gensie ngâl u a, Nangmah hun dote chun na min chuh a gen thanghuoi sek ui.

²¹Aw LALPA, nang mah hun mudahte chu ka mudah puoh a ahim? Nang hun suol haw chu ka kihdak puoh a ahim?

²²Amau haw chuh a chin bei in ka mudah a: Amau haw chuh melma a ka simtel ahi.

²³Aw Pathien, gunchuh tak in ei en suok inla, ka lunggil hi he tie: Ei patep inla, ka ngaihtuohna haw hi he’n:

²⁴Chun, keimah a hin nunsietna a um leh a um loh en inla, Tichun, kumsawt hinna lampi a chun ei pui in.