Read Gangte SAM 143 Bible Online

SAM 143 - Gangte bible

SAM 143

¹Aw LALPA, ka pauchamna hi ngatha’n la; Lungsiet ka ngetna ahin nakhang a na dawh in la, Na muon-umna leh na diktatna ziekin ei dâwng in.

²Na sawntawlawi chung ahin vaihawm ki’n la; Na mitmuh achun mihing mawng mawng thiemchang um ding ahi puoh ngâl a.

³Melmate chun ei delh u a: Ka hinna hi lei ah a khên nêl u a: Malai a thisa guolin, thim lak ah ei chut sak u a.

⁴Zieziekchun ka thagau hi ka sung ah a chau a; Ka sunga ka lunggil hi a lungkham ta a.

⁵Malai nite chu ka hezing sek a; Na thilhih haw chengcheng chu ka ngaihtuoh sek a: Na khut nasephaw chuh ka sut zel a.

⁶Ka khut haw hi nang lam ah ka zak sek a; Ka hinna hi gam gaw bangin nang mah ah a dangchâk sek hi.

⁷Aw LALPA, ei dâwng meng in; ka thagau a chau hi; Kei ahin na mai sel ki’n la; Khutilochun kawkhuka chieh suk te bang phet in a na um khang ka.

⁸Zinglam in na zaidawhna ei zak sak inla; Nang ka hun gingcha ngâla: Ka chieh na ding lampi ei sinsak inla; Ka hinna nang lam ah ka dawmsang ngâla.

⁹Aw LALPA, ei dote apat hin ei humbit inla; Nei sel dingin na kieng ah ka hung tai hi.

¹⁰Na deih dân hih dingin ei sinsak inla; ka Pathien na hi ngâla; Na thagau phatak chun; lamphei achun ei pui hen.

¹¹Aw LALPA, na min ziekin ka hinna hi vengbit inla; Na diktatna ziekin ka hinna hi buoina apat in la dawk in.

¹²Na zaidawhna chun ka melma haw chuh hih mangthai inla, Ka hinna hih lungkham haw chengcheng chu hih mangthai inla; Na sawntawlawi ka hi ngâla.