Read Gangte SAM 144 Bible Online

SAM 144 - Gangte bible

SAM 144

¹LALPA ka suongpi chu pahchak in um hen, Amah chun ka khuthaw hi galkap a sinsak sek hi. Ka khutzung haw hi do dingin a tîl zela.

²Ka suongpi leh ka kulhpi, Ka kulh In sang, ka phaw leh ka kisêlna, mite ei nemsieh sakpa chuh ahi.

³LALPA, mihing hi bang ahi a, na ngaihsak sek a? Thi thei mihingte hile bang ahi a, na ngaihtuoh sek ahi?

⁴Mihiem hi hu tawbang phet ahi a: A damsung nite chuh lîm mang sek bang chauh ahi.

⁵Aw LALPA, na vante hih kûn in, hungsuk inla: Tang haw chuh khawih inla, tichun hung khu dawk ina.

⁶Kawlphet sak inla, amau haw chuh hih zak in; Na thal haw chuh kap dawk inla, hih buoi niu neu in.

⁷Chunglama kipatin na khut hun tha suk inla; Ei Hukdawk inla, tuilien a kipat leh gamdang mite khuta kipatin ei humbit in.

⁸A kam u chun zuou thu a gen sek u a, chun, a khut changlam u chuh a diklo ahi.

⁹Aw Pathien, nang mah chawiân in la thak sang ka ting, Kingkang gui sawm nei haw tawh nangmah pakcha’n lasa’ng ka.

¹⁰Amah chuh ahi lalte kawma hukdamna pie a, chemzâm mi hih sie thei laka a sawntawlawi David hukdawkpa chuh.

¹¹Ei hukdawk inla, malzinhaw khuta pat ei hukdawk in, a kam u chun zuou thu a gen sek u a, khut changlam u chu khut changlam diklo ahi.

¹²Ka chapateu a tanglak u a thing duoh banga a um u a; Ka chanu teu le leng in um banga a ning a suong sek banga um tieng u leh;

¹³Ka buh in teu a dima; thil bang cheng a um lei lui a; Ka belam teu inle a sanga sang tamtak, a singa sing tamtak ka gam u a a hun suoh tieng u leh;

¹⁴Ka bâwngguol teu inle no tampi pi nei u henla; Kulh bang vihvanna leh saltanna um kihen la, kawtthêl u a lungkham husa khat chale zâk in um kihen;

¹⁵Zie tawbang a vangsakna dawng nam chuh a hamphau hi; Ahi, LALPA Pathien nam a neite chuh kipâk takin a um sek ui.