Read Gangte SAM 145 Bible Online

SAM 145 - Gangte bible

SAM 145

¹Aw Lalpen, ka Pathien, hun chawiân ing ka; Na min hi kumlekhuo’n pakcha’ng ka.

²Nicheng in pakcha’ng ka ting, Na min hi kumlekhuo’n pakcha’ng ka.

³LALPA chuh a lopi a, nasa taka pahchak ding ahi; A lopi zie chuh sutdawk ding guol ahi puoi.

⁴Khang khatin khang dang kieng ah na lopi zie chuh pakcha sawn zel un au. Na thilhih lopi tak haw chuh hetsak un au.

⁵Nang mah chawih-atna kilawm zie lopi tak leh, Na thilmak hihte chu ngaihtuoh ing ka.

⁶Mite’n na thilhih huoisie takte chu gen untin uh; Ken le na lopina hetsak ing ka.

⁷Na phatna lopi tak hetzing na gen untin uh, Na diktatna thu lawp takin lân sa’n au.

⁸LALPA chuh mi lungsiet thei lainatna a dim; Lungnem, zahngaihna nasa tak nei ahi.

⁹LALPA chuh mi chengcheng a ding in a pha a; A lainatna chuh thilsiem chengcheng chung ale a um hi.

¹⁰Aw LALPA, na thilsiem chengcheng chun na kieng ah kipah thu gen untin uh; Na mithiengtho ten le hun pakcha’n au.

¹¹Na lalgam lopi zie thugen in, Na thilhih theihna thu chun holim un au.

¹²Mihiem chate kienga a thilhih lopi tak haw leh, A lalgam hawihna lopi zie hetsak dingin.

¹³Na lalgam chuh kumlekhuo lalgam ahi a, Na thuneihna chuh khang um lai chan in um zing ina. LALPA chuh a thugen taphawt achun a ginum a, a thilhih cheng achun zahngaihna a dim ahi.

¹⁴LALPA chun kipukte chengcheng chu a tuzing a, Kun tha a umte chule a kaitho sek a.

¹⁵Thilsiem haw cheng mitin a hun ngak zing u a; Nang a hun takin a an uh na pie zing seka.

¹⁶Na khut na zaka, Thilhing chengcheng utchakna chu na hih tai seka.

¹⁷LALPA chuh a lampi chengcheng ah a diktat a, A thilhih na chengah mi lungsiet thei tak ahi.

¹⁸LALPA chuh amah sam cheng kawm achun a nai a; Tihtak taka amah samte cheng kawm achun a nai sek hi.

¹⁹Amah kihchate duhthusam chuh a lawhtit sak a; A kiko husau chuh za’n tin, amau chuh hukdam ina.

²⁰LALPA chun amah hehpihte cheng cheng chu a vawppha seka; himahleh, minunsiete vang chu sumangthai ina.

²¹Ka kam hin LALPA pahchakna thu gen intin; Chun, phehlevo chengcheng chun a min thiengtho chu kumlekhuo’n pakchau hen.