Read Gangte SAM 146 Bible Online

SAM 146 - Gangte bible

SAM 146

¹LALPA chuh pakchau in, Aw ka hinna, LALPA chuh pakcha’n.

²Ka damsung chengin LALPA chuh pakcha’ng ka ting; Ka hin lai chanin ka Pathien pakcha’n la sa’ng ka.

³Milien milal haw chuh gingcha ki’n la, Mi panpih theilo mihingte chuh gingcha diek ki’n.

⁴A hat uh a beih tieng leh, amah chu lei achun a vaikit a; Zie ni mah mah chun a thil guonggalh haw chu a bei ngâl hi.

⁵Jakob Pathien in a panpih te chuh kipâk takin a um sek u a, LALPA a Pathien u a kinepna neite chuh:

⁶Amah chuh lei leh van leh, Tuisuohgiet haw leh a sunga um chengcheng siempa ahi; Amah chun thutak kumlekhuo dingin a vawppha sek hi.

⁷Amah chun nuoisiehna thuok haw a dingin vai a hawm sek hi. Amah chun gilkielte kieng ah an a pie sek a; LALPA chun suongkul tângte chuh a pawtdawk sak seka;

⁸LALPA chun mitdûkte mit a hihvak sak sek hi; LALPA chun kun tha haw chuh a kaitho seka; LALPA chun mi diktatte chuh a hehpih sek a;

⁹LALPA chun malzin haw chuh a enkawl sek a; Pa neilo leh meithaite chuh a panpih sek a; himahleh, mi nunsiete lampi chun sietna a tun sek hi.

¹⁰LALPA chun kumlekhuo’n vaihawm intin, Aw Zion, na Pathien chuh khang chengcheng chan in Lal in a chu a. LALPA chuh pakchau in.