Read Gangte SAM 147 Bible Online

SAM 147 - Gangte bible

SAM 147

¹LALPA chuh pakchau in; I Pathien uh pakcha a lasak hi a pha ngâl a; Zahngaihna’n adim a, pahchak dawl mawng ahi.

²LALPA chun Jerusalem chuh a tungdawk kit a; Israel nawhdawk haw chu a puikhawm kita.

³Lungthim thasie te chuh a hih dama, A liemna teu chuh a tuom sak sek hi.

⁴Aksi tam dân a sim a; Amin uh a sa chiet sek a.

⁵Ka LALPA chuh a lopi a, thilhih theihna lama le nasa tak ah; A pilna chuh tâwp neilo ahi.

⁶LALPA chun tawhden a umte chuh a dawmsang a; Minunsie te chuh lei ah a hih niem zela.

⁷Kipahthu gena LALPA chawiân in la sau inla, Kingkang tawh I Pathien uh pakcha’n lasau in.

⁸Amah chun van khu mei a zam lieh sak a, Leichung a dingin guoh a guonggalh a, Tang haw achun hampa a kehsak sek a,

⁹Amah chun gamsa kieng ah a nek ding a pie sek a, Va-âkno hâm hâm te kieng ale.

¹⁰Amah chuh sakawl hatna ah a kinga puoh a; Mihiem keng thahatna haw ale kipahna a nei puoi.

¹¹Himahleh, LALPA chun amah kihchate chungah kipahna a nei sek hi. A zahngaihna kineppih te chung achun.

¹²Aw Jerusalem, LALPA chuh pakcha’n; Aw Zion na Pathien chuh pakcha’n.

¹³Amah chun na kulh kawtkhak kamna thiktawn haw chuh a hih khauh a; Na sunga na cha na nau um haw chuh a vangsak a.

¹⁴Na gamgi sung achun chamna a siem a; Buh phapen chi’n a hih dim sek a.

¹⁵A thupiek chuh lei ahin a sawldawk a; A thu chuh hattak in a tai sek hi.

¹⁶Vuk tang chuh belam mul guol in a pie a; Vuk kie chuh vut guolin a thehzak sek hi.

¹⁷A vukkhal chuh changbuong guolin a paih dawk sek a: Amah vawt na masang achun kuo a ding thei ding?

¹⁸A thu chuh a sawldawk a, ziehaw chuh a hih tui a: A huih a nun sak a, khutichun tui haw chuh a hung luong zel a.

¹⁹A thu chuh Jakob kawmah a lat saka, A thuguot leh a vaihawm haw le Israel kawmah a lat sak sek hi.

²⁰Amah chun kuo nam chung ale khutichun a hih kha puoi: A vaihawm haw chulah a he chuom puou hi. LALPA chuh pakchau in.