Read Gangte SAM 17 Bible Online

SAM 17 - Gangte bible

SAM 17

¹Aw LALPA, ka diktatna thu hi henla, ka kiko husa hi ngaitha’n le; Lepchieh gen khalo kam apat a pawt, ka pauchamna ahin, na nakhang a na dawh in.

²Ka chungthu pukna chuh na ma apat a pawt hihen la; Na mitin thil dik en hen la.

³Ka lunggil hi enchien inla, zan in nei hung vehtha leh chun le; Nei enchien a bangmah na mu puoh ngâla; Ka kam in gen khiel puo’n a ka ti chak kêi hi.

⁴Mihiem thilhih a vang, na mûk a thu pawt ziekin Mi ngawngtawihte lampi chuh ka pêl a.

⁵Ka kalsuon haw hin na lampi a hawh chak kêi a, Ka kênghaw hin a tawhthawlh kha puoi.

⁶Aw Pathien, ka hun sam sek a, nangin nei dâwng ding na hi ngâla: Kei lam ahin na nakhang hun dawh inla, ka thugen hi ngaitha’n.

⁷Aw, nangmah a ginna nga taphawt amau dote laka na khut changlama hukdam sek pa, Na nunnemna maktak chuh hun etsak in.

⁸Mi dukdaklo ei bawlsiepa, Ei do zinga ei kimvelte lak achun

⁹Mit naucha tawbang in vawppha’n la, Na thanuoi haw a chun nei sel gu’n la.

¹⁰Amau haw chun lainatna a nei puou a, A kam un chapo takin a pau sek u a.

¹¹Tuhin vang chuh ka kalsuon na phawt u ah ei huol vel tau a, Lei a ei sukpuk guon a mit u chun ei en sal u a,

¹²A mau chuh sakeibaknei sapeh utcha tak leh, Sakeibaknei thahat lai mun thip a bawk zing bang mai chuh ahiu.

¹³Aw LALPA, tho inla, Amau chuh kimaituohpih inla, paihtha’n la, Ka hinna hi mi dukdaklote lak ah na chemzâm in humbit in,

¹⁴Aw LALPA, na khut in mihiemte lak ah, Khawvel mihiemte lak ahin, humbit inla; Amau chanvo chuh tu damsunga a neih u hi a hi a, A gilpiu chuh na go in na sukdim sak sek a: Cha lungkim na kham set a nei u a, A sum mat val u chuh a chasen teu a taihsan sek ui.

¹⁵Ken vang chuh diktatna nei in na mel mu’ng ka ting: Nang mah batna nei a ka thawh dawk tieng le chuh lungkim kei ta’ng ka.