Read Gangte SAM 18 Bible Online

SAM 18 - Gangte bible

SAM 18

¹Aw LALPA ka hatna ka hun hehpih hi. LALPA chuh ka suongpi leh ka kulhpi leh ei humbitpa ahii;

²Ka Pathien, ka suongpi dettak ahi a, amah chuh ka kisêlna ahi. Ka phaw leh, ka hukdamna kileh ka insang ahii.

³Pahchak tâk LALPA chuh ka sama; Khutichun ei do te lak ah hukdam in um ing ka.

⁴Thihna khauhuol ten ei zem a, Pathien ngaihsak loh na tuilien haw chun ei tawk a.

⁵Sheol khauhuol haw chun ei zem suok a: Thihna thâng haw ah ka âwk a.

⁶Ka lungkham in LALPA chuh ka sama, Ka Pathien kawmah panpihna ka ngên a, Amah chun a Ho-In apat chun ka aw a he a, A masanga ka kiko husa chuh a bil ah a lut tai.

⁷Zie phet chun lei hi a lîng a, a kithing ta a, A lung a nat ziekin tâng haw chu le, A kingakna nasan in a lîng in a puok zak ta a,

⁸A nak apat chun meikhu a zam to a, A kam a pawt mei chun a katum ta a, Amah apat chun mei haw le a kuong puotpuot ta mai a.

⁹A mah chun van le a hih kûn a, a kie suk ta a: A kengnuoi achun thimna a hung um ta a.

¹⁰Cherub chungah a chu a, a leng ta a: A hi, huih thate chung achun kin takin leng vengveng a.

¹¹Thimna hi akiselna mun ah amah ûmkimvel bukcha’n a siem a; a kikhuhna ding, van a meipi te leh tuia thimna te chuh.

¹²A ma a vakna ziek chun meipi sah tak te chuh a phuvang a, Giel te leh mei-âm te a kie hut hut a.

¹³LALPA chun van a git saka, Chungnung pên pa’n a Aw a suoh a; Gielte leh mei-âmte a kie hut hut a;

¹⁴Chun, a thalpi haw chuh a kap dawka, a mau haw chuh a nawhzak a; A hi, kâwl a phêt sak zawl zawl zinga, a hih buoi vengvung ta mai a.

¹⁵Ziephet chun, aw LALPA, na hilhgaih zieka, Na nak a hu pawt in a mût phut ziekin, Tui luonna haw chuh a hung kilang a, Lei kingak na haw chuh dawk sak in a um ta a.

¹⁶Amah chun changlam apat in a hun bân a, ei tu a; Tui tampi lak apat chun ei kaidawk a.

¹⁷Ei dote hattak lak apat chun ei humbit a, Ei hawte lak ale; kei a dingin a hât taluo ngâl u a.

¹⁸Amau chun ka vangsiet nin ei tawh den u a, Himahlele LALPA chuh ei panpih ahi.

¹⁹Amah chun mun awngthawl tak ah ei puidawk a; Ka chunga a kipâk ziekin ei na hukbit tai.

²⁰LALPA chun ka diktat dungzui in kipahman ei pie a; Ka khut haw thientho dungzui ngêi in ei din ahi,

²¹LALPA lampi chuh ka hawh a, ka Pathien kawm apat in gilo takin ka chieh mang ngei puoh ngâla.

²²A vaihawmna chengcheng ka ma ah a um sek a, A thu guot haw chuh ka paih ngei puoh ngâl a.

²³A masang achun gensiet bei ka hi a, Manlohna apat chun ka kivengpha sek a.

²⁴Zieziekchun LALPA chun ka diktat bang takin ei din ta a, Ka khut haw hih a mitmuh a a thien dân dungzui in.

²⁵Mi lungsiet thei tak kawm achun, lungsiet thei tak guol in na kilang a; Mi phabukim kawm a chun phabukim in na kilang a.

²⁶Mithiengthote kawm a chun thiengtho in na kilang a; Chun, mi genhakte kawm achun genhak in na kilang a.

²⁷Kingainiem te chuh hukdam ding na hi ngâla; Himahleh, mi chapo haw vang chuh hihniem in na tin.

²⁸Nang in ka thaumei nei hâl sak ding na hi ngâla; LALPA ka Pathien chun ka thimna hi hih vak ina.

²⁹Nangmah panpih in gâl ka zo ngâl a; Ka Pathien panpih mah in kulhbang ka châwp khup hi.

³⁰Pathien vang, a lampi ah a phabukim a; LALPA thutiem chuh adik a; Amah a ginna nga chengcheng te ding chun amah chuh phaw ahi.

³¹LALPA tihloh Pathien dang kuo a um hi? I Pathien uh tihloh chuh kuo suongpi a um hi?

³²Hatna a ka kâwng a ei gâk pa leh, Ka lampi bit taka ei siem sak pa Pathien chuh.

³³Amah chun ka kênghaw hi sazukpi keng tawbang in a siem a, Ka munsang tak haw achun ei umsak sek a.

³⁴Ka khut haw hi galkap dingin ei sinsak sek a, Khutichun ka bân hawn le thik thalpo a luoi zo hiel hi.

³⁵Nangin na hukdam na phaw nei pie a: Na khut changlam in nei kai a, Na panpihna chun nei siem lien ta a.

³⁶Ka nuoia ka kalsuon na chuh na hih lien ta a, Khutichun ka kênghaw hi kithawlh puo’n a.

³⁷Tichun, ei do haw chuh delh ing ka ting, delhpha mai ing ka: Sukmangthai a a um macheng uh kilehhei kit ta puo’ng ka.

³⁸A thawhkit theih loh na ding un sat liem ing ka ting: Ka keng nuoi ahin puk un au.

³⁹Nang in kidona a ding chun hatna’n ka tai ah nei gâk ngâl a; Ei sawisate chuh ka nuoi ah na suniem ta a.

⁴⁰Ei mudah haw chuh ka sukmang theihna dingin, Nang in ei do haw chuh nei nungngat sak ta ngâl a.

⁴¹Amau chuh a kiko u a, himahlele a hukdawk ding kuomah a um puou a: LALPA mah chuh a sam u a, himahlele amah chun a dâwng puoh ngâla.

⁴²Ziephet chun lei vui huih mût mang theih haw bang mai hin ka khên nêl dimdem a: Khawlai buonthuok tawbang mai in ka paih dawk tai.

⁴³Nang in mihaw kisuolna lak chun nei humbit a; Namte luchang in nei siem a: ka het khâkloh mi haw chun ka na a sem u a.

⁴⁴Ka chanchin a het tak u leh ka thu zui untin: Malzin haw chun ka kawmah nuoilut chuh tan au.

⁴⁵Malzin haw chuh a lau u a, a In sang u akipat chun kilîng kawm in a hung pawt u a.

⁴⁶LALPA chuh a hing zing hi; ka suongpi chuh pahchak in um hen. Ka hukdamna Pathien chuh chawihsân in um hen:

⁴⁷Phuba ei lâksak pa leh, mitin ka nuoia suniempa Pathien ngêi chuh.

⁴⁸Amah chun ka melmate lak apat ei hukdawk a: Ahi, nangin ei kisuolpihte chunglam achun nei dawm kâng a; mi ngawngtawihte lak achun nei humbit sek a.

⁴⁹Zieziekchun, aw LALPA, namte lak a chun hun chawisâng ing ka ting, na min pakcha’n la sang ka.

⁵⁰Amah chun guolzawhna lopi tak, a lal siemte kawmah a pie sek a; A thaunuh David leh a suonte chung ngêi achun, Kumkhuo’n a chit zie a latsak hi.