Read Gangte SAM 19 Bible Online

SAM 19 - Gangte bible

SAM 19

¹Vante’n Pathien lopi zie a hetsak u a; Vanthamzawl za tak khun a khut suok chuh a lat sak sek a.

²Sun in sun kieng ah thu a gensawn a, Zan in zan kieng ah hetna a sulang sawnsawn a.

³Thu gen mawngmawng leh pau mawng mawng a um puou a; A awu chuh bil a zak theih ahi puoi

⁴A awu chun lei chung chengcheng zel suok a; A thuu chuh kâwlmawng tiengin a thang suok ta a, Ziehaw a chun ni a dingin puon-In a zak a.

⁵Zie ni chuh moneipa dinga indan apat pawt chu tawbang ahi. Mihat a taih na lampi a kipâk taka tai tawbang ahi

⁶A kipatna kâwlmawng tâwp apat in ahi a, A taih kuolna chuh a lehlam tâwp tiengin ahi a, A sat dân helo a kisel mawng mawng a um thei puoi.

⁷LALPA dân chuh a phabukim a, hinna a bawlpha sek a; LALPA thu hetsak chuh a muon um a, mi mawl ahih ching sek hi:

⁸LALPA thuzawh na chuh a dika, lungthim a sukipak sek a: LALPA thupiek chuh a thiengtho a, mit a hih vak sek hi.

⁹LALPA kihchakna chuh a thieng a, kumkhuo a dingin a um sek hi: LALPA vaihawmna chuh a dika, a diktat kimvel chiet hi.

¹⁰Ziehaw chuh sana sanga deih um zaw ahi a, ahi, sana thiengtho tampi sang inle: Khuoizu sangin a thum zaw a, khuoizu thieng kei sang inle a thum zaw ngâl in.

¹¹Zielo chun le ziehaw chun na sawttawl hi hilhgaih in ka um sek a: Ziehaw zuih chuh kipahman nasatak muhna ahi sek hi.

¹²Himahleh, kuo a amau thil hihkhelh he thei ding? Gitlohna kisel haw lak ahin ei thielngim in.

¹³Thil sukhiel hâm hâm lo dingin na sawttawl hi ei tu chak bikbek in; Ka chungah a mau haw thu neih sak ki’n: Khutichun phabukim in um ing ka.

¹⁴Aw LALPA, ka Suongpi leh ei Tanpa! Ka kama thu pawt haw leh ka lunggil ngaihtuohna cheng hi, na mitmuh in pawm tâk hi hen.