Read Gangte SAM 20 Bible Online

SAM 20 - Gangte bible

SAM 20

¹Lungkham ni chun LALPA’n hun dâwng he uo; Jakob Pathien min chun hun vengbit henla;

²Mun thiengtho apat chun panpihna hun sawl sak heh uo; Zion apat chun hun hihhat he uo;

³Na thillat chengcheng chuh hezing henla, Na hâlmang thillat a chun kipâk hen; Selah

⁴Na lunggil deihlam chuh hun pie henla, Na lemguot chengcheng chuh hun lawhtit sak hen.

⁵Na hukdamna a chun lâwpin la sa’ng ka ting un, I Pathien min un I puonzak u haw hi zakna lai hitiu: LALPA chun na ngetna chengcheng chuh hun lawhtit sak hen.

⁶LALPA’n a sathau a nuhpa hi a hukdam hi tih tun chuh ka he tai A khut changlam hukdam na tha chun A van thiengtho apat khun a ma’n hun dâwng ina.

⁷Khenkhat in kangtalai a kimuonpih u a, khenkhat in sakawl a kimuonpih u a: Himahleh, ei hawn vang chuh LALPA I Pathien min u chuh sam zawi tiu.

⁸A mau chuh chau in puk untin, Himahleh, eihaw vang chuh I tho dawk u a, I ding chang zawu hi.

⁹LALPA, hukdam in: I sap tak u leh Lalpen in ei dâwng ta hen.