Read Gangte SAM 21 Bible Online

SAM 21 - Gangte bible

SAM 21

¹Aw LALPA, lal chuh na hatna a hin lawp in tin uh, Na hukdamna ahin a kipâk na mai zên ding e!

²A lunggil deihlam chuh na pie a: A mûk a thil nget chuh a phal lo diek puoh a. Selah

³Phatna a vangsakna te’n na muok ngâla: A lu chung ah sana thiengtho lallukhuk na khuk sak a.

⁴A mah chun hinna a ngên a, na pie a; Dam sawt na, kumkhawsawt a dam zing na chuh.

⁵Na panpih ziekin a lopi mah mah a: Chawihânna leh lopi na a chungah na nga sek a.

⁶Kumlekhuo a din vangsakna nasatak mun na siem sak ngâl a. Na ma ah lawpna’n na sukipak ngâla.

⁷Lal chun LALPA chuh a gingcha ngâl a, Chungnung pên a lungsietna dettak ziekin lîng puo’n a.

⁸Na khut in nangmah hun do haw cheng chuh hawldawk vek in na tin: Na khut changlam in nangmah hun hawte chule hawldawk suok ina.

⁹Na lungnat tak leh amau chu hâltuina mei kuong puotpuot bang in siem in na tin; LALPA chun amau haw chu lungna’n valh zo in tin, Mei chun katum vek ina.

¹⁰A suonteu chuh lei apat sumang in na tin, A chateu chuh mihiem chate lak apat in sumangthai in na tin.

¹¹Na chung a thil phalo ahih a guot u chun: Thil gilo a ngaihtuoh u chuh lawhting puo’n au.

¹²Nangin amau haw chuh len mang sak ding na hi ngâla, Na thalgui te chuh a mai uh dawi in luoi zo kêi in na tin.

¹³Aw LALPA, na hatna a chun chawih-ât in um inla: Khutichun na thilhih theihna chuh pakcha’n la sa’ng kau.