Read Gangte SAM 22 Bible Online

SAM 22 - Gangte bible

SAM 22

¹Ka Pathien, ka Pathien, bang dinga ei taihsan na hi? Bangati a ei panpih dinga gamla taka um a, ka tauna thu apat gamla taka um na hi?

²Aw ka Pathien, sun in ka hun uou a, himahleh nei dâwng puoh a; Zankhuo’n ka hun uou a ka khawngai diek puoh a.

³Himahlele, aw nang Israel te pahchakna a cheng sek, Nang vang na thiengtho hi.

⁴Ei suontu teu chun a hun gingchau a, A hun gingchau a, tichun nang na humbit sek.

⁵A hun uou u a, tichun humbit in a um sek ui: A hun gingchau a, tichun muolpho in a um ngei puou.

⁶Himahleh, kei vang chuh mihiem le ka hi puoh a, tangtel phet ka hi a; Mihiemte gensiet leh mite muhsit ka hi.

⁷Ei mu lam chengin ei nuihsan u a; A mûk a bo sak u a, a luchang a thing u a,

⁸“LALPA chungah kinga ta’n la, amah khan amah hi hukdam ta mai hen la: A chunga a kipâk ziekin humbit ta mai hen la” a tiu a.

⁹Nang vang chuh sûl apat a ei ladawkpa na hi a: Ka nu nawitui sen a ka umlai khan nangin nei humbit a.

¹⁰Sûl apat mawng inle nangmah chunga ngak ka na hi a: Ka nu sunga pat mawng inle nang chuh ka Pathien na hi.

¹¹Ei gamlat ki’n la lungkham na ding a nai ngâla: Ei panpih ding kuomah a um ngâl puoh a.

¹²Bâwngchal tampi’n ei um u a: Bashan gama bâwngchal hât taktak haw chun ei ûmkimvel hut hut u a.

¹³Sakeibaknei gawlhat humham bang leh va-âk tawbang in, A kam uh lien tak takin ei kât khum u a.

¹⁴Tui tawbanga buokthâk in ka um a, Ka guh chengcheng le kisupel in a um a: Ka lunggil hi khuoilu thaumei bang a hi a; Ka gil lak a hin a tui zo tai.

¹⁵Ka tha hi leibel sie hal bangin a gaw zo ta a; Ka lei nasan le ka khadang ah a bek chak kêi a; Nang in thihna lei vui ahin nei kuol sak ta ngâla.

¹⁶Ui haw chun ei um suok ngâl u a: Thil phalo hih um khawm haw chun ei um chak kêi u a; Ka khut leh keng haw hi a sun pawp u a.

¹⁷Ka guh chengcheng hi ka sim thei a; A mau chun lah ei en teu zuol zuol u a:

¹⁸Ka silhlechen a kihawm u a, Ka puonâk ding in phun a san u a.

¹⁹Himahleh, nangin chuh, aw LALPA ei gamlat hiel ki’n la: Aw, ei suhatpa, ei panpih dingin hung kin inla.

²⁰Ka hinna hi chemzâm lak achun humbit inla; Ka hinna hi uicha thilhih theihna lak achun humbit inla.

²¹Sakeibaknei kam apat hin ei hukbit in; Ahi, bâwngchal ki apat chun nangin nei hukdawk tai.

²²Ka suohpihte kawm achun na min gen ing ka ting: Kikhawmhaw lak achun hun chawiân ka.

²³LALPA kih chate haw, a mah chuh pakchau in; Jakob suonte haw, a mah chuh limbawl un; Israel suon chengcheng te haw a masang achun lau kawm in dingun.

²⁴A mah chun gimtheih thuok haw gimtheih na chuh a musit puoh a, a kihdak puoi; A mai chuh ka masang ah a sel puoh a; A mah ka uou tieng a ngaitha sek hi.

²⁵Kikhawpna lopi taka ka hun pahchak sek na hi nangmah kawmah a hi: A mah kihchate masang achun ka thutiem chuh muol suoh ka.

²⁶Mi gimtheite chun neu un tin, tai un au: A mah hawlte chun LALPA chuh pakcha’n au: Na lunggil u chuh kumlekhuo’n hing zing hen.

²⁷Kâwlmawng a mi chengcheng in le hezing untin, LALPA lam ah kihei tan au: Nam tina chitin na masangah khun in hun ho un au.

²⁸Chungnunna chuh LALPA a ahi a: Namtin chunga vaihawmpa ahi ngâl a.

²⁹Lei a ana ipmu sate haw chuh a masang ah khun un tin: Leivui a chieh suk chengcheng te chuh a masangah bawkkhup untin, chun, kei chuh amah a dingin hing ing ka.

³⁰Khangthak ten a na sem un tin uh; Khangthak hung um kit ding haw kawm achun LALPA chanchin chuh hilh un au.

³¹A pieng nailote kawm achun “LALPA’n a mite a hukdawk thu gen un au,” ti’n.