Read Gangte SAM 25 Bible Online

SAM 25 - Gangte bible

SAM 25

¹Aw LALPA ka lungthim hi na kawmah ka kawih chak kêi sek hi.

²Aw ka Pathien, nang ka hun muong a, Muolpho in ei umsak ki’n la; Ka melmate chuh ka chungah kichawihsang sak ki’n.

³Ahi, nang hun ngakte chuh muolpho in um sak ki’n la: Aziek umlo a gukhah taka hihte vang chuh muolpho in um u hen.

⁴Aw LALPA, na lampi chuh ei hetsak inla; Na lampi chanchin haw chuh ei sinsak in.

⁵Na thutak a chun ei pui inla, ei sinsak in; Nang chuh ka hukdampa Pathien na hi ngâl a; Sun ni tum in ka hun ngak zing hi.

⁶Aw LALPA, na lainatnate leh na chit zie te chuh hezing inla: Malai pek a kumlekhuo a na um ahi ta ngâl a.

⁷Ka tanglak gitlohna haw leh ka sukkhelhna haw chuh hezing ki’n la: Aw LALPA na phatna ziekin, Na chit zie bang zelin ei hezing in.

⁸LALPA chuh a pha a a dik a hi: Zieziekchun mi gilote chuh a lampi sinsak ina.

⁹Kingainiemte chuh lampi dik ah a pui a: Nuoilutchuh haw chuh amah lampi sinsak ina.

¹⁰A thugawlh leh a thu hetsak zui haw ding chun LALPA lampi chengcheng chuh chitna leh thutak ahi suok kêi hi:

¹¹Aw LALPA, na min ziekin Ka thulimlohna ngaidam inla, huoisie tak ahi ngâla.

¹²LALPA kihchate chuh kuote ahiu hi? Amau chuh a lampi tel ding chu hilh ina.

¹³A hinna chu nuomsa tak in um in a; A suon haw chun gam chu luoh un au.

¹⁴LALPA chuh amah kihchate guolpha ahi a A thugawlh chuh amau haw chuh hetsak in a.

¹⁵Ka mit in LALPA lam chuh ka enzing sek a: A mah chun ka keng haw hi len a pat in ladawk ding ahi ngâl a.

¹⁶Kei lam hung nga’n la, ka chungah zahngai in; Thawmhau leh gimthei takin ka um ngâl a.

¹⁷Ka lunggil buoina haw hi ahung nasa ta a; Aw, ka lungkham na haw apat hin ei puidawk in la.

¹⁸Ka gimtheih zie leh ka thuok dan hi ngaihtuoh inla, Ka gitlohna chengcheng ngaidam in.

¹⁹Ka melmate tam dân chuh ngaihtuoh tie; Bang tienga ei haw ahi tau em.

²⁰Aw, ka hinna veng in la, ei humbit inla. Muolpho in ei umsak ki’n la, nangmah achun ka kisel ngâla.

²¹Ka lungthim phatna leh ka dikna’n ei humbit a, Nang ka hun ngak zing sek ngâl a.

²²Aw Pathien, Israel hi a lungkhamna chengcheng a pat in hukdawk in.