Read Gangte SAM 30 Bible Online

SAM 30 - Gangte bible

SAM 30

¹Aw LALPA, hun chawiân ka, nang nei kaidawk a, Ei do te chuh nei diliem sak loh ziekin.

²Aw LALPA ka Pathien, panpih ngên in ka hun uou a nang nei sudam ta a,

³Aw LALPA, nang ka hinna hi Sheol apat chun na puidawk a; Kawkhuk a ka chieh suk lohna ding in nangin nei vawp hing zel a.

⁴Aw a mithiengte haw, LALPA pakcha’n la sau inla, A min thiengtho chuh pakchau in.

⁵A lungnat chuh mitphetkal mai ahi seka, A deihsakna chuh hinkhuo a ding ahi; Kahna hi giek dingin nitâk lam leh a hunglut thei a, Mahleh zinglam in kipahna a hung tung sek hi.

⁶Ken vang ka hin khuo a nawp pêt leh, “Bangmah tikin kilîng puo’ng ka,” ka ti a.

⁷LALPA, nang in, na deihsakna ziek in ka tâng chuh na na din det sak ta a: Himahlele na mai na sel a; ka na lungzîng ta kha.

⁸Aw LALPA, nang ka hun uou a; LALPA kawm mawng achun lungsietna ka ngên kha:

⁹“Kawkhuk a ka kum suk a, ka thihna achun phatchuomna bang a um hi? Leivui in a hun pakcha dem? Na ginumna chuh a phuong na dem?

¹⁰Aw LALPA, ngaitha’n la, ei lungsiet inla, LALPA nang ei panpihpa hung hin la.”

¹¹Ka lusûnna chuh kei dingin lâmna na suok sak a; Ka saidippuon chuh nei hâwk sak a, kipahna puon nei silh sak ta a:

¹²Ka lopina hi thip lo a, nangmah pahchak na la a sak theih na ding in. Aw LALPA ka Pathien, kumkhuo’n nang kawmah kipahthu gen zing ing ka.