Read Gangte SAM 31 Bible Online

SAM 31 - Gangte bible

SAM 31

¹Aw LALPA nangmah achun ka kisel a; bangmah tikin muolpho in ei umsak ki’n la, Na diktat na ziekin nei humbit in.

²Kei lam ahin na na khang hun dawh inla; ei humbit in, Kei dingin suongpi dettak, ka kulhpi leh ka bitna na hi.

³Nang chuh ka suongpi leh ka kulhpi na hi ngâl a; Zieziekchun na min ziekin ei pui inla ei kai in.

⁴Ka awkna dinga a gûka lên a phah nau a hin ei kaidawk inla; Nang chuh ka bitna In sang na hi ngâla.

⁵Na khut ah ka thagau ka hun kawlsak hi; Aw LALPA, thutak Pathien, nangin nei tan tai.

⁶Milim pathien pannabei te ngaihsak haw chuh na mudah a: himahleh, LALPA achun ka ginna ka nga a.

⁷Na zaidawhna ziekin lâwpin kipâk ing ka, Ka gimtheihna na mu ngâl a; Ka hinna hi a gimtheih lai inle na he sek hi.

⁸Chun, ei do pa khut ah nang in nei pie puoh a; Ka keng hi mun awngthawl na tawh sak zaw ta a.

⁹Aw LALPA, ei lungsiet inla, lungkham in ka um ngâla; Ka mit hi lungkham na ziekin a sie huoi huoi a, ahi, ka hinna leh ka taksa na san in.

¹⁰Ka damsung hi khuoisak na’n a bei ta ngâla, ka kum haw hi le mau na’n a bei ta ngâla; Ka thulimlohna ziekin ka tha a kham a, ka guhte le a gawp zo tai.

¹¹Ei do pa ziekin ka min hi a sie zo ta a, A hi, ka vengte a dingin tizat-um ka hita a, ka melhette ding inle lauh-um tak ka hi ta a; Khawlai a ei mu hawn le ei taihsan ta ngâl u a.

¹²Mithi a hetngilh tawbang phet un hetngilh in ka um a; Leibel kêk bang phet ka na hi tai.

¹³Ahi, mi tampi’n sak leh thang ah ei hêk ngâl u a, Lauh-umna’n ei ûmkimvel a; Ka hinna a lak theih na dingun, kei ei kalh in thil a guonggalh khawm u a,

¹⁴Himahlele, Aw LALPA nang ka hun gingcha ngâla: “Ka Pathien na hi,” ka ti a.

¹⁵Ka hun te chuh na khut ah a um a; Ei dote apat leh, ei bawl gimthei haw lak a hin ei humbit inla.

¹⁶Na mel vakin na suok hi hun salhvak inla; Na hehpihna ziekin ei hukdam in.

¹⁷Aw LALPA muolpho in ei umsak ki’n la; nang ka hun sam ngâla, Mi nunsie haw chuh muolpho in um u hen la, Pau mawh hielin Sheol ah chieh u hen.

¹⁸Mûk lepchieh haw chuh pautheilo in um u hen; Ziehaw chun kiletsak leh musit kawmin, Pau leiluok tak in mi diktatte a gensie sek ui.

¹⁹Aw, na phatna chuh a nasa na maizen e, nangmah a ginna ngate dinga na hih sak chu!

²⁰A mau chuh mihiem sawisak na lak a chun na humbitna mitmuh in selgu’n na tin. Lei nielhat na lak achun Bukcha ah sel gu’n la.

²¹LALPA chuh pahchak in um hen; Melma te’n khawpi a ûmbichilhnau a ka um lai ale a zaidawh zie maktak ei muhsak ngâla.

²²Kei chuh la ka humhai in, “Na mitmuh a pat paihmang in ka um tai,” ka na ti a. Himahlele, lungsiet na ngên a ka hun uou na aw kha na na he ngâl a.

²³Aw, a mi thiengtho chengcheng te, LALPA chuh hehpih un; LALPA chun a mi ginum chuh a humbit a, himahleh, kisathei taka hihhaw chuh nasatak in a din sek hi.

²⁴LALPA ngak chengcheng te haw, Hattak in um unla, chun, ama’n na lungthim hawu hun suhat ina.