Read Gangte SAM 33 Bible Online

SAM 33 - Gangte bible

SAM 33

¹Mi diktat te haw, LALPA a chun kipâk in la sau in; Mi dik ding chun Pathien pahchak hi kilawm mawng ahi.

²Kingkang in LALPA pakchau unla: Tumgit gui sawm nei zat in amah pakcha’n la hawih tak sau in.

³A mah chawiân in la thak sau inla; Husa lopi tak tawh thiemtak leh ngeih tak in tum un.

⁴LALPA thu chuh a dik a; a thilhih cheng thu muon-um taka hih ahi sek ngâla.

⁵Diktatna leh vaihawmna kitûp a ngaina sek a: Lei chung hi LALPA zaidawhna’n a dim hi.

⁶LALPA thun van haw chuh siem ahi a; Ziehaw chengcheng chu le a kama hu a siem ahiu a.

⁷A mah chun tuisuohgiet tui haw chuh, hai sunga tui kawihkhâwm bang phetin a kawihkhâwm a; Tui thuk haw chule thil kawihkhawmna In a kawih guolin a kawih pha sek.

⁸Lei chung luoh chengcheng ten LALPA chuh kihchau henla: Vannuoi a um chengcheng chuh maksa’n ding u hen.

⁹A mah chun a gena a hung um ta a; Thu a pie a, a hung um det ta ngâla;

¹⁰LALPA’n namte lemguot chuh bangmah lo a suok sak a: Mitin ngaihtuohna chuh bangmah lo a suoh sak sek hi;

¹¹LALPA lemguot vang chuh kumlekhuo’n um zing ina, A lunggil a a ngaihtuoh haw chuh suon chengcheng tieng in um zing ina.

¹²LALPA Pathien a nei nam chuh a hamphau hi; A mah go luoh dinga a tel mite chuh.

¹³LALPA’n van apat khun a vak en suk a; Mihiem chate chengcheng hi a mu vek a;

¹⁴Lei a um chengcheng hih A umna mun apat khun a hun en suk a;

¹⁵A bawn u a lungthim chuh ama’n a siem sak ahi a, A nasep chenguh enzui sek pa chun.

¹⁶Leng chuh a sepaih tam ziek in a bit puoh a: Mi hangsan hi a hât mah mah ziekin humbit ahi diek puou:

¹⁷Kidona sakawl hi kihumbitna dingin bangmah ahi puoh a: A hât mah mah ziek in kuo mah humbit diek puo’n a.

¹⁸Ngaitie, LALPA mit chuh amah kihchate chunga chun a chu zing sek a, A zahngaihna kineppihte chunga chun;

¹⁹A hinnau chuh thihna lak apat hukbit ding leh Kiel tunna a amau haw tung hing ding in.

²⁰I hinnau hin LALPA a ngak zinga: A mah chuh ei panpih leh I phawu ahi.

²¹A mah a chun I lungthim u hi a kipâk a, A min Thiengtho I ginchak ziek un.

²²Aw LALPA, na zaidawhna chuh ka chung u ah um hen la, Nangmah ah kinepna ka nei ngâl u a.