Read Gangte SAM 34 Bible Online

SAM 34 - Gangte bible

SAM 34

¹Bangtik inle LALPA chuh pakcha’ng ka ting: Amah pahchakna la chuh ka kam ah pawt zing ina.

²Ka hinna hin LALPA chuh suong intin: Nuoilutchuhte chun zie chuh heu intin uh, kipâk un au.

³Aw, LALPA chuh ei pahchak pih unla, A min chuh pakcha chiet hitiu.

⁴LALPA chuh ka hawla, chun, amah chun ei dâwng a, Ka lauh na cheng apat chun ei humbit ta a.

⁵A mah ente chuh a mel uh a hung vak a: A mel u chuh bangmah tikin zakcha puo’n au.

⁶Zie mi gimthei hi a kiko a, chun LALPA chun a dâwng a, A lungkham na chengcheng achun a hukdawk ta a.

⁷A mah kihchate chuh, a kimvel u ah LALPA vânsâwlchâk chun a umpih a, A hukdawk sek hi.

⁸Aw LALPA phat dan hi patep mawng tiem u: A mah a ginna nga mi chuh a hamphai.

⁹Aw, a mithiengthote haw, LALPA chuh kihchau in: A mah kihchate ding chun tâksap na himhim a um ngâl puo’n.

¹⁰Sakeibaknei vanglai le a kisam in, a gil kiel seka: LALPA hawlte vang chun thilpha himhim kisam puo’n au.

¹¹Hung unla, naupangte, ka thu ngaithau in: LALPA kihchak dân hun na sinsak ing ka.

¹²Phatna a muh theihna ding a, hinna deih a, Damsawt utcha chuh kuo ahi?

¹³Na lei chuh gitlohna laka vengpha’n la, Na mûk chuh thepna thu gen lo dingin veng pha’n.

¹⁴Gitloh taihsan inla, thilpha hih in; Chamna hawl inla, delhzui zelin.

¹⁵LALPA mit chun mi kitûp lam a en sek a, A bil chun a kiko uh za dingin a ngaitha zing sek.

¹⁶LALPA mel chun thil hihkhielte a do seka, Amau haw hetzingna chuh lei apat a sumang dingin.

¹⁷Mi diktatte chuh a kiko tieng u leh LALPA chun a na dâwng a, A lungkham na chengcheng u apat chun a hukdawk sek hi.

¹⁸LALPA chuh lunggil a thasie te kawmah a nai seka, Lungthima kisik tapohte chuh a hukdam sek hi.

¹⁹Mi diktatte’n sukgimtheihna tamtak a tuok ui: Himahlele LALPA’n ziehaw chengcheng achun a hukdawk sek hi.

²⁰A guh chengcheng a vawp tupa; Khatchale sukbawt ahi puoi.

²¹Thil phalo in mi nunsie hihlum in tin: Mi diktat mawhchansakte chuh thiemloh chang un au.

²²LALPA chun a suokte hinna chuh a tandawk sek a: Amah a kingate chuh khatcha’n le thiemloh chang puo’n au.