Read Gangte SAM 35 Bible Online

SAM 35 - Gangte bible

SAM 35

¹Aw LALPA, ei sawisate chuh nangin sawisa’n la: Ei dote chuh nangin do inla.

²Phaw neu leh phaw lien tu’n la, Ei panpih dingin kipan la.

³Tiengcha le thalpi pan inla, ei delhte lampi chuh a na nang inla: Ka hinna kawm ahin, Na hukdampa ka hi ie, ti’n la.

⁴Ka hinna sukmang guoa hawlte chuh sukmuolpho leh sukzahchak in um henla: Ei suksietna ding lungthim suongtuoh haw chuh, taihsiet sak in gen ding helo in um u hen.

⁵LALPA vânsâwlchâk in a delhmang henla, Buhsi huih mût mang tawbang in um u hen.

⁶LALPA vânsâwlchâk in delh zel ngâl in. A lampiu chuh thim tak leh nâl tak hi henla,

⁷A ziek beiin ei matna dingun a lên u chuh kawkhuk ah a zak guu a, A ziek umlo in ka hinna kiekna dingin kawkhuk a lai ngâl u a.

⁸A kigin loh kal in a chung u ah sietna tung henla; A lên zak gûk akhan amah ngêi âwk henla; Zie sietna ngêi achun kie lut hen.

⁹Chun, ka hinna hi LALPA ah kipâk intin: A hukdamna a chun kipâk ina.

¹⁰Ka guh chengcheng hin, “LALPA, nang tawbang kuo a um? Nangin mi gimtheite chuh amau sanga hatzaw apat na humbit a, Ahi, mi gimthei leh mi chagah chuh a susiepa apat na humbit a, Nang tawbang kuo a um?” ti’n a.

¹¹Hetpih diktatlo takte a hung kipan un; Ka thil hêtkhâk loh te ei dawng u a.

¹²Ka hinna chan khawp hielin, Thilpha thil gilo in ei din a.

¹³Kei vang chun, a damloh pêt un kawlladip ka silh a; Ka hinna hi anngawl in ka sugimthei ngâla; ka pauchamna chuh keimah angsung ngêi ah a hung vaikit a.

¹⁴Ka guol ahim, ka suohpih ahim bangin ka lungkham a, Ka chieh viela, mi’n a nu a sûn guolin lungkham in ka khu’na.

¹⁵Himahlele kei ka kisuih leh amau chuh a kipâk zaw deuh u a, a kikhawm hiel u a: Migilo maimai haw chuh ei sawisa dingin a kikhawm a, zie chuh ka na he puoh ngâla; hailo in ei sawisa diek diek u a.

¹⁶Guolvakna poh ah chiemnuih bawl haw maimai tawbang phetin a hau ei gawih khum u a.

¹⁷LALPA, nangin bang chan ei etthâk guo na hi a ahim? A lungnat nau lak apat chun humbit inla. Ka hinna hi sakeibaknei lak achun humbit inla.

¹⁸Tichun, kikhawpna lopi tak achun kipah thu gen ing ka ting: Mi tamtak lak achun hun pakcha’ng ka.

¹⁹Ka melma hawu chun diklo takin ei eu kiu hen: Aziek beia ei mudah te chuh a mit un kiho zuol zuol kiu hen.

²⁰Chamna thu mawngmawng a gen puoh ngâl u a: zie gama um hiet hiet te lepbawlna thu chuh a suongtuoh zawu hi.

²¹Ahi, amau chun kam lientak ei kat khum u a; “Chei! chei! I mit un I mu tau!” a tiu a.

²²Aw, LALPA, nangin na mu a, thipsan ki’n la: Aw, LALPA, ei gamlat ki’n.

²³Ka Pathien leh ka LALPA, kisuhalh in la, ka chung a vaihawm ding leh, Ahi, ka thu a ei panpih dingin hak in.

²⁴Aw LALPA ka Pathien, na diktatna bang zelin ei vaihawm sak in; Amau chun ei eu kiu hen.

²⁵A lungthim u chun, “Chei, I duhthusam u chuh I nei tau hi” tikiu hen. A mau chuh “I valh zo tau hi,” ti diek kiu hen.

²⁶Ka sietna chunga kipakte chuh muolpho tak leh gen ding helo hiel in um hawn u hen. Ka chunga kisulien haw chuh muolphona leh zahchâkna silh sak in um hen.

²⁷Ka diktat na chunga kipâk te chuh lawp a kiko in kipâk takin um u henla: Ahi, “A suok vangphat na chunga kipâk sek LALPA chuh a lopi ie, Limbawl in um hen la,” ti zing u hen.

²⁸Tichun ka lei hin diktatna thu gen intin, Na pahchakna thu le sun ni tum in gen ina.