Read Gangte SAM 36 Bible Online

SAM 36 - Gangte bible

SAM 36

¹Minunsie sukkhelhna chun ka lunggil sung ah thu a gen a, “A mitmuh ah Pathien lauh na mawngmawng a um puoi,” tin.

²“Ka thulimlohna mudawk puou untin, hun mu dah diek puo’n au,” tin. Amah mitmuh ah amah mah a kipakcha kawm ngâl seka.

³A kama thu pawt haw chuh gitlohna leh lepbawlna thu ngen a hi seka: Chingthei taka thilhih ding leh thilpha hih a haihsan tau a.

⁴A zâlkhun achun thil gilo a suongtuoh seka, Lampi phalo a chun a chieh hâmhâm a; gitloh na chuh a kihdak puoi.

⁵Aw LALPA na chitna chun van a sukha a; Na muon-um na chun chung vandum khu a suna.

⁶Na diktatna chuh Pathien tâng haw bang ahi; Na vaihawm haw chuh tui thuk tak tawbang ahi: Aw LALPA, mihing leh sa na hukbit seka.

⁷Aw Pathien, na nunnem na chuh a thuk na e! Mihing chate chun na thanuoi a chuh sek u a.

⁸A mau chuh na insung phatna’n tai mah mah untin uh; Na kipahna lui chu amau haw dâwnsak in na tin.

⁹Hinna tuikhuk chuh na kieng ah a um ngâla: Na vak achun vak mu’ng ka tin uh.

¹⁰Aw, nangmah hun hete chung achun na nunnemna chuh latsak zelin la. Lungthim diktak pute chung ale na diktat na chuh latsak zel inla.

¹¹Kisathei keng chuh ei sawisa din kei lam ah suon kihen la, Migilo khut inle ei nawhmang kihen.

¹²Zie akhun thil gilo hihte chuh a puksieu a: Sawtpaih ahiu a, a tho dawk thei ta puou hi.