Read Gangte SAM 37 Bible Online

SAM 37 - Gangte bible

SAM 37

¹Thil phalo hihte ziekin kisulungkham nuom ki’n la, Diktat lo taka hih haw chule awtcha diek ki’n.

²Hampa guola ât puk in um pai un tin, Ham hing guolin vuoi ding ahi ngâl u a.

³LALPA chuh muong inla, thilpha hih in; Zie gam ahin um inla, muon umna delh zelin.

⁴LALPA chung achun le kipâk zelin; Tichun na lunggil deihlam haw chuh hun pien a.

⁵Na umdan ding chuh LALPA chungah nga’n la; Amah chuh muong in la, A man hih vek ina.

⁶Na diktat zie chuh vak tawbang in suoh sak intin, Na vaihawmna chuh sun lai bang mai in.

⁷LALPA achun châwl inla, Amah chuh ngak tun tun in: A umdan a hamphatna mu haw ziekin kisulungkham nuom ki’n, Ngaihtuohna gilote pitit sak ziek chun.

⁸Lungnat hi haihsan inla, thangtawm kisik in: Kisulungkham nuom ki’n, thil hihkhiel in a hung kie khawng sek hi,

⁹Thil phalo hih haw chuh satthak a um ding ahi ngâl u a: LALPA ngakte vangin chuh gam hi luoh un au.

¹⁰Chawmkhat hal leh mi nunsie haw chuh um ta puo’n tin uh: Ahi, a umna mun chuh en en leh chinle, um ta puo’n a.

¹¹Nuoilutchuhte vang chun gam chuh luoh un au: Kichamna nasatak chungah kipâk un au.

¹²Minunsiete chun mi diktat chuh a do u a, A ha a gawih khum sek ui.

¹³LALPA chun amah chuh nuihsan ina: A ni a hung nai tai tih a het ziekin.

¹⁴Gimthei leh chagahte hihpuk ding leh Mi diktat te hihlum ding in, Mi dukdaklote chun chemzâm a lau a, a thalphel uh a luoi u a.

¹⁵A chemzâm un amau haw lungchang sun intin, A thalphel u haw chuh hih bawt in um ina.

¹⁶Mi diktat thil tawmcha neih chuh Mi nunsie thil tampi nei keihkuih sangin a pha zawi.

¹⁷Mi nunsie bân chuh sukbawt in um ding ahi ngâla: Himahleh, mi diktat chuh LALPA’n a tu zing sek hi.

¹⁸LALPA chun mi pha bukim ni haw chuh a he a: A goluoh ding u chuh kumlekhuo’n um zing ding ahi.

¹⁹Hun phalo ale muolpho puo’n au: Kiel kum inle kibuting takin um un au.

²⁰Himahleh, mi nunsie te vang chuh beimang un au, LALPA dote chule hampa pak guolin Sukmangthai in um un tin uh, meikhu’n zam mang un au.

²¹Mi nunsie chun a palâk a, a din kit sek puoi: Himahleh, mi diktat chuh a tângphal a, a pie zing sek hi.

²²LALPA vangsak na changte chun gam hi luoh untin uh, Himahleh, a sapsiet changte chuh sukmangthai in um un au.

²³LALPA chun miphate kalsuon chuh a pui sek a, A deihbang hihtute chuh a veng sek a.

²⁴Puk mahleu le, puk tha tâwp puo’n a. LALPA’n a khut in a tu zing ngâla.

²⁵Naupang ka na hita a, tuhin a têk ka hung hita a, Himahlele mi diktat chuh taihsana a um ka he kha puoh a, A suonte khutdawh le ka mu kha diek puoi.

²⁶Nichang tumin mi a lungsiet a, a palâk sak seka; A suonte chuh vangsakna a hung hi sek ui.

²⁷Gitloh taihsan inla thilpha hih in; Khutichun kumlekhuo’n zie chun cheng zing zieng in.

²⁸LALPA chun vaihawmna diktat a ngaina seka, A mithiengtho haw chuh a taihsan ngei puoi, Mi diktat chuh kumlekhuo a dingin vawpphat in a um a; Himahleh, mi nunsie suonte vang chuh sukmangthai in um ina.

²⁹Mi diktatte chun gam hi luoh un tin uh, A sung ahin kumlekhuo’n cheng zing un au.

³⁰Mi diktat kam chun chitna thu a gen sek a, A lei chun vaihawm diktat na thu a gen sek hi.

³¹A Pathien dân chuh a lunggil ah a um a; A kalsuon haw mawngmawng chuh a teu puoi.

³²Mi nunsie chun mi diktat chuh a en tha a, Suklup a guo sek hi.

³³LALPA’n amah chuh a khut ah pie puo’n tin, A vaihawm tak u leh mawhchansak phal puo’n a.

³⁴LALPA chuh ngak inla, a lampi chuh hawh in, Khutichun gam hi luoh dingin hun limbawl ina: Mi nunsiete sukmangthai a a um pet u chuh hun mu’n la.

³⁵Mi nunsie chuh nasa taka thu nei leh, Lebanon a Sidar sel duoh hut hut banga, a bawk biel buol pêt ka mu a.

³⁶Himahlele lampi ah ka va chieh a, chun, ngaitie, amah chuh ana um ta puoh a: Ahi, amah chuh ka hawla, himahlele muh theih ahi ta puoi.

³⁷Mi demna bei tiemteh inla, mi diktat chuh en in, Khutibang mi tawpna ding chuh tha muonna hi ding ahi ngâla.

³⁸Dan bawhsiete vang chuh a guola suksiet in um hawn un au, Mi nunsiete tawpna ding chuh sukmangthaina hi ta’n a.

³⁹Amahvang chuh mi diktat te hukdam na chuh LALPA kawm apat hi’n a. A mah chuh lungkham laia a kulhsang uh ahi sek a.

⁴⁰LALPA’n amau chuh a panpih a humbit sek hi, Amah a chuh a puklut ziekun, Mi nunsie lak achun humbit in a hukdam sek hi.