Read Gangte SAM 39 Bible Online

SAM 39 - Gangte bible

SAM 39

¹“Ka lei hin thil ka hihkhelh loh na dingin, Ka um dân haw hi vengpha’ng ka ting: Minunsie te ka masanga a um sung cheng un Ka kam hi mûk kânna’n kân ing ka,” ka ti a.

²Khutichun thipkêi in pau lo in ka uma, Phachuom lo hielin thipkêi in ka um a; Himahlele, ka lungkhamna chuh chawhthawh in a um zaw bawn a

³Ka sung ahin ka lunggil sa hut hut a; Ka ngaihtuoh ka ngaihtuoh chun mei chuh a kuong dawk a: Chun, ka lei hin thu a gen ta a

⁴“LALPA ka tawpna ding leh, ka damsung ding bang chan ahi dem, tih ei hetsak inla; Bang tienga dengdel ka him tih ka hettheih na dingin.”

⁵Ngaitie, ka damsung nite hi khutpêk bawk chan phetin na siem a; Ka kum hi na mitmuh a chun bangmah kham ei puoh a; Mitin hi a phat lai pêt un le a pum un bangmah lo mai ahiu a. Selah

⁶Mitin hi lim tawbang phet ahiu a: Selah. A buoi thâwn mah mah chiet ui; Go a khawlkhawm sek u a, a luoh ding a he puoh ngâl u a.

⁷Chun, LALPA, tuhin banga ka ngak ding? Nangmah ah ahi, ka kinepna a um sek.

⁸Ka sukkhelhna chengcheng apat ei hukdawk inla: Mingawlte gensiet in ei umsak ki’n.

⁹Nangmah hih ahih ziekin Ka pau puoh a, ka kam le ka ka diek puoi.

¹⁰Nei zêpna hi ka kawm apat la chawn inla: Na khuttum a sukmang ka hi hi.

¹¹Mi a sukkhelhna haw zieka hilhgaih na haw a na sawihzawi hin, A duh-âmna hi hâng nek bangin na susie sek a; Mitin hi hu a hing mai ahiu hi Selah

¹²Aw LALPA, ka pauchamna hi ngaitha’n la, ka hun uou na ahin na nakhang dawh inla; Ka mittui luong hi khawngaihsan mai ki’n: Na malzin ka hi a, Ei suonte bang a khuolzin nichuong mai ka hi ngâla.

¹³Aw, zie apat ahi ka pawt a, ka hinna a beih masang hin, Hatna ka neih kit kit theih na dingin ei kiheimang san ki’n.