Read Gangte SAM 4 Bible Online

SAM 4 - Gangte bible

SAM 4

¹Aw ka diktatna Pathien ka hun sap tak leh ei dâwng inla; Ka lungkham tak leh nangin nei hih navak seka; Ei lungsiet inla ka pauchamna hi ei ngaihthak sak in

²Aw mihing chate haw, ka lopi na hi bang chan a na sukmuolpho dinguh? Selah Bang chan ahi die thil dukdaklo te na na ngaihnat u a, zuou thu na hawl ding uh?

³LALPA chun Pathien ngaihsak mi chuh a mah din a kawih chuom tih hi he zawu in. LALPA chun ka sap cheng leh ei dâwng ina.

⁴Lungnau inla, gilo kiu in; Na zâlkhun chung u achun na lunggil un kingaihtuoh unla, thip hiet hiet un. Selah

⁵Diktatna kithawihna lân unla, LALPA chuh gingchau in.

⁶Phatna mawngmawng kuo’n ei muhsak ta dem leh? ti haw chuh tamtak a um ui. Aw LALPA, nang ngêi in na melvak khan ei hun salh inla.

⁷A buh u leh a uain uh a pun kuoma a kipahnau sang a, Kipahna nasa zaw ka lunggil a hin nei kawih saka.

⁸Thamuong takin kuol ing ka ting, ih le ipmu’ng ka: LALPA, nangmah ngêi hi na hi, kei mai cha a le bit taka ei um sak zing sek chuh.