Read Gangte SAM 41 Bible Online

SAM 41 - Gangte bible

SAM 41

¹Gimtheite ngaihtuoh mi chuh a hamphau hi: Lungkham ni leh LALPA’n a mah chuh humbit ina.

²LALPA’n amah chuh humbit intin, suhing ina, lei a hin vangsak in um ina; Amah dote ut ut a bawl dingin pie ki’n.

³LALPA’n a natna zâlkhun a a kuolna mun ah hih hât ina: Nangin a damloh lai inle a natna cheng na sukdam sak seka.

⁴Ken, “Aw LALPA, ei hehpih inla, Ka hinna hih sudam inla, na chungah thil ka sukhiel ngâl a,” ka ti a.

⁵Ei dote haw chun, “Bangtik leh a thi dem, a min a bei dem?” ti’n. Ei gensie sek u a.

⁶Chun, a lak u a khatin ei hung veh tak le lah, thu dukdaklo ngen poh a gen seka; A lunggil chun gitlohna a la khawm sek a; A pawtdawk tak leh a genzak sek hi.

⁷Ei hawte chengcheng chun a gûkin ei gensieu a: Ei hihsietna ding a ngaihtuoh u a.

⁸Amau chun, “Natna phalo takin a buokkhum ta a: Tu a a kuol hi thokit ta puo’n a,” a tiu a.

⁹Ahi, ka guol ka kivawppih theih, ka ginchak tak, ka chângthâk nekpa ngêi chun A khawtalzum ka chungah a lek tai.

¹⁰Himahlele, aw LALPA, nangin ei lungsiet inla, Amau haw ka thuk theihna dingin ei kaitho kit in.

¹¹Zie ahin ka chungah na kipâk hi tih ka hêi, Ka melmapa chun ei zawh sek loh ziekin.

¹²Himahleh, kei vang lungthim phatak ka putna ahin nang in nei tu zinga, Na ma achun kumlekhuo a dingin nei kawih a.

¹³LALPA, Israel Pathien chuh, Kumsawt apat kumsawt tiengin pahchak in um hen. Amen, Amen.