Read Gangte SAM 42 Bible Online

SAM 42 - Gangte bible

SAM 42

¹Sakhi luicha tui duh a ha huoi huoi bang in, Aw Pathien, ka hinna hi nangmah utcha’n a ha huoi huoi hi.

²Ka hinna hi Pathien utcha’n, Pathien hing utcha’n a ha huoi huoi hi: Bangtik ahi die Pathien ma a ka tun a, ka va kilat ding?

³Ka mittui hi sun leh zan in ka an ahi a, Mite’n “Na Pathien khawi a um ahi?” ei ti mat chet u a.

⁴Zie thil haw hi ka hezing a, ka hinna hi ka sung ah ka sung buo a, Mipi lak ah chieh a, kipahna leh pahchakna gi tawh, mipi kut, Pathien Ho-In zuon in amau ka kai sek kha.

⁵Aw ka hinna, bang dinga khun zing? Bangatih leh ka sung ahi buoi zing na him? Pathien ah kinem in: a mel a dam na ziekin Amah chuh pakcha kit ding ka hi ngâla.

⁶Aw ka Pathien, ka hinna ka sung ahin a khun zinga: Zieziekchun Jordan leh Hermon gam akipat in, Mizar tânga kipat hin ka hun en zing hi.

⁷Na tui luong gi dul dul haw ahin tui thuk leh tui thuk chuh a ki-uou u a: Na tui kinawk leh na tui kinâwk chengcheng haw chun ei vuktum ta a.

⁸Himahlele LALPA’n a zaidamna chuh sun in thu pie’n tin, A la chun zan leh ei umpih ina; Ka hinna Pathien kawma pauchamna chun.

⁹Pathien ka suongpi kawm achun, “Bangati a ei hengilh na him? Bangati a ei dote ei nemsiehna zieka lungkham a ka mau viel viel sek?” ti’ng ka ting.

¹⁰Ka taksa a thihna theih liemna um tawbang in ei dote chun ei gen sie sek u a: “Na Pathien khawi ah a um hi?” ei ti matchet u a.

¹¹Aw ka hinna bang dinga khun zing? Bangati a ka sunga hi buoi na him? Pathien kineppih in: amah chuh pakcha kit ding ka hi ngâla, Ka hukdampa ka Pathien chuh!