Read Gangte SAM 48 Bible Online

SAM 48 - Gangte bible

SAM 48

¹LALPA chuh a lopi a, nasa taka pahchak ding ahi. I Pathien uh khawpi ah, a tâng thiengtho achun

²A tâng thiengtho san zie kilawm tak, khawvel chengcheng kipahna chu, Zion tâng chuh ahi, Mâllam panga, Lal lopi tak khawpi chuh.

³A leng In haw achun Pathien in kulhsang ahih a kihetsak a.

⁴Ngaitie, leng haw chuh a kikhawm u a, A kipunkhawm u a.

⁵A muh phet u chun, mak a sau a; A lungkham u a, a leng mang pai tau a.

⁶Zie tak achun a kilîng sie tau a; Numei nauhanat bangin natna’n a man behlap a.

⁷Khawsak huih mang in Tarshis lawng lien haw chu a susie sek a.

⁸Sepaih hawnte LALPA khawpi ah, I Pathien khawpi achun, Bil a ka zâk bang ngêi in ka mu tau hi: Pathien in zie khawpi chuh kumlekhuo a dingin hih det ina. Selah

⁹Aw Pathien, na Ho-In sunggil achun Na nunnem zie hi ka ngaihtuoh u a.

¹⁰Aw Pathien, na min bang ngêi in, Na pahchakna chuh kâwl mawng tiengin a tung a: Na khut changlam chuh guolzawh na’n a dim hi.

¹¹Na vaihawmna haw ziekin, Zion tâng chu kipâk tak in um henla, Juda chanute chuh kipâk tak in um u hen.

¹²Zion chuh chieh kimvel unla, a kimvel achun chieh un; A gâlven insang haw chule sim suok un.

¹³A kulh hawu chuh tiemteh phau unla, A leng In haw chuh ngaihtuoh un; Khangthak hung um kit haw kawma na hilh theih na dingun.

¹⁴Zie hi Pathien ahi a, kumlekhuo a I Pathien uh ahi ngâla: Thih tieng nasana ei puipa hi’n a, tih na hilh theih na dingun.