Read Gangte SAM 49 Bible Online

SAM 49 - Gangte bible

SAM 49

¹Mitin chengte haw, ziehi ngaithau inla, khawvel a um chengcheng te haw, nakhang a na dawh un:

²Mineu leh milien, Mi neizo leh mi gimthei inle.

³Ka kam hin chitna thu gen intin; Ka lunggil ngaihtuoh chuh het thiemna thu hi’n a.

⁴Tehkal thun ka na khang dawh ing ka ting: Ka thu gil gen chuh kingkang in hilhchien ing ka.

⁵Ni phalo haw achun, ka khawtalzum vela thulimlohna chun ei um viel mahlele, Bang ziek in ahim ka lauh ding?

⁶A mah hauhsakna muong a, A mah neihzawhna nasatak suonghaw chun:

⁷Kuomah amah kitan thei puo’n tin, Pathien kawmah a hinna tatna piek sak thei puo’n au:

⁸Hinna tatna ding chuh aman a tam mah mah a, a hun tawk um theilo ahi.

⁹Mi chuh kumkhuo a a dam zing na ding a, Muotna a muh lohna ding chun.

¹⁰Miching haw le a thiu a, Mingawl leh mi mawlte le a bei mang gel u a, A go u chuh mi dangte a nutsieh sak u a.

¹¹A gam teu chuh amau min in phuok mahleu, a thân u chuh kumkhuo a a In dinguh ahi ta a, khang chengcheng tienga a chênna dinguh ahung hi tai. A gam u haw chu a mau min mah mah a lawh sak sek ui.

¹²Himahlele mihiem hi limbawl in a um zing puou a: Gamsa mangthai sek te bang phet ahiu hi.

¹³Zie hi ngawlhuoi taka a kimuonnau gah chu ahi a: a thil neih u a kisulung-awite tawpna ding chuh zie chu ahi. Selah

¹⁴Belam thah ding banga Sheol a dinga guot ahiu hi, Thihna chuh amau chingpa hi’n tin: Zang takin thân ah kum suk un tin, a mellepâng u le bei pai intin, Sheol chuh a chênna dinguh hita’na.

¹⁵Ka hinna vang chuh Pathien in Sheol khut apat tan dawk ina. A mah chun ei na tuok ding ahi ngâla. Selah

¹⁶Mi chuh hung hausa henla, A insung achun hauhsakna hung dim mahlele lau diek ki’n:

¹⁷A thih tieng leh bangmah keng diek puo’n tin. A hauhsak na chun amah zui tha suk chuom puo’n a.

¹⁸A dam lai in kihamphat sak hen la, thil na hih phat tieng leh mi’n hun pakcha sek mah leu

¹⁹Amau chuh a suonteu-suon kawmah chieh ding ahiu a; Bangmah tikin vak hi mu ta puo’n au,

²⁰Mihiem hi a zahum a, zie hethiem lote chu gamsa mangthai sekte bang phet ahiu hi.