Read Gangte SAM 5 Bible Online

SAM 5 - Gangte bible

SAM 5

¹Aw LALPA ka thu hih ei ngaihthak sak in la, Ka lauhthawngna hi ngaihsak in:

²Ka lal leh ka Pathien, ka hun uou husa hi ngaitha’n la, Na kawma paucham ka hi ngâl a:

³Aw LALPA, zingkal hin ka aw hi a na he sek in na tin: Zingkal chun ka dinmun hi na masangah ka hun tun a, ka hun na ngak zing hi.

⁴Gilo-salo kipahpih Pathien na hi puoh ngâla; Migilo chuh na kawm tung puo’n a.

⁵Mi uongte chuh na mitmuh in ding thei puou intin uh, Gitlohna hih haw chengcheng na haw sek a.

⁶Zuou gen hatte chuh sumangthai in na tin: LALPA’n thisan suohhat leh milepbawl hatte chuh a kihdak tuntun hi.

⁷Kei vang chuh na phatna leh na ngilneihna nasa tak ziekin na In thiengtho ah hung lut ing ka. Kihcha kawmin na Ho-In thiengtho lam nga’n hun ho sek ing ka.

⁸Aw LALPA, ka melmate ziek hin na diktat na ziek chun ei pui inla: na lampi chuh ka masang ahin siem zang in.

⁹A kam u achun muon umna mawngmawng a um puoh a. A sung lam u chuh dukdak lohna ngawn ahi: A gawl u chuh thân kihawng a hi a; A lei un mi a pakcha lêm sek ui.

¹⁰Aw Pathien amau haw hi mawh chansak inla; A mau lemguotna ngêi chuh puklawhna’n mang u hen: A sukkhelhnau tamtak ziek hin sawn dawk inla; Na chungah a hel ngâl u a.

¹¹Himahleh, nangmah a a ginnau nga chengcheng haw vang chuh kipâk u hen. Na hum sek ziekin kumlekhuo’n kipâk in kiko hen: Na min ngaina mite chu le nangmah achun kipâk takin um u hen.

¹²Mi diktat chuh vangsak ding na hi ngâla; Aw LALPA, amah chuh phaw tawbang in deihchuom na chun ûmkimvel inla.