Read Gangte SAM 51 Bible Online

SAM 51 - Gangte bible

SAM 51

¹Aw Pathien, na nunnem na dungzui in nei hehpih inla: Na lainatna nasat dungzui in ka sukkhelhna haw hi nawt mang in.

²Ka thulimlohna ei silthien sak tin ten inla, Ka gitlohna ei silngim sak in.

³Ka sukkhelhna haw ka he ta ngâla: Ka gitlohna hi ka masangah a um zing ngâl a.

⁴Na chungah, na chung maicha ah thil ka hihkhiel a, Na mitmuh in thil gilo chuh ka na hih ta a. Na thugen in thiem na chansak thei a, Vai na hawma demna bei na hih theih na’n.

⁵Ngaitie, gitlohna a hinthak in ka um a; Ka nu’n gitloh na’n nau in ei vawp a.

⁶Ngaitie, sunggil lam ahin thutak na deih sek a; Zieziekchun, sunggil lam ahin chitna nei hetsak inla.

⁷Husop in ei hih thieng inla, tichun, thieng ing ka. Ei silthieng inla, tichun, vuk sangin vam zawng ka.

⁸Nawpna leh kipahna chuh nakhang in ei zak sak inla; Guh na sukbawt haw hi a kipah kit theih na dingin.

⁹Ka gitlohna haw lak a hin na mai sel inla, Ka thulimlohna chengcheng hi nawtmang in.

¹⁰Aw Pathien keimah ahin lunggil thiengtho tak siem inla Ka sung ahin thagau thak leh diktak siem thak kit in.

¹¹Na kienga kipat hin ei paihmang ki’n la, Na thagau thiengtho hi ei lâksak ki’n.

¹²Nei hukdam kipahna chuh ei pie kit inla, Thagau thunuom in ei tuzing in.

¹³Khutichun, thil sukhiel haw chuh na lampi te chu sinsak ing ka ting; Tichun migilo haw chun nang lam hung nga kit un au.

¹⁴Aw Pathien, kei ei hukdam Pathien, thisan suoh haw lak ahin ei hukdam in; Khutichun, ka lei hin na diktatna thu lawp tak in la’n hun sa’n a.

¹⁵Aw LALPA, nangin ka mûk hi hawng inla; Tichun, ka kam hin nang mah pahchakna thu hun suohdawk ding hi ven.

¹⁶Kithawihna chungah kipahna na nei puoh ngâla; khuti hi kileh chuh pie’ng ka. Hâlmang kithawihna chungah lungkimna himhim na nei puoh a.

¹⁷Pathien pawmtâk kithawihna chuh thagau thasie hi ahi; Aw Pathien, lunggil thasie leh kisik tuntun hi musit puo’n la.

¹⁸Na deihbang takin Zion chungah thilpha hih inla; Jerusalem kulh chuh tung ding kitin.

¹⁹Khutichun, diktatna kithawihnahaw chungah kipahna nei ta’n la; hâlmanga thilpiek leh hâlmang a pum piek ding chun bâwngchal haw chuh maichâm achun lân ta’n au.